عمر رسیدہ خاتون کا بغیر محرم کے سفر حج کرنے کا حکم:

عام طور پر فقہاء یہ تحریر فرماتے ہیں کہ بغیر محرم کے حج کا سفر کرنا جائز نہیں ہے ۔
لیکن حضرت مفتی ولی حسن صاحب رحمه الله سے ایک مرتبہ دریافت کیا گیا کہ ایک ۷۵ سالہ عورت قابل اعتماد عورتوں کے قافلہ کے ساتھ حج کے لیے جا سکتی ہے یا نہیں؟
حضرت مفتی صاحب رحمه الله نے اجازت مرحمت فرمائی اور دلیل میں در مختار کی یہ عبارت پیش فرمائی:

أما العجوز التي لا تشتهي فلا بأس بمصافحتها ومس يدها إذا أمن، ومتي جاز المس جاز سفره لها، ويخلو إذا أمن عليه وعليها، وإلا لا. (الدر المختار: ٦/۳٦۸، سعيد).

فیض الباری میں ہے:

وفي كتب الحنفية عامة عدم جواز السفر إلا مع محرم قلت: ويجوز عندي مع غير محرم أيضاً بشرط الاعتماد والأمن عن الفتنة، وقد وجدت له مادة كثيرة في الأحاديث، أما في الفقه، فهو مسائل الفتن. (فيض الباري: ۲/۳۹۷).

حاشیہ میں مرتب صاحب لکھتے ہیں:

منها: أمر النبي ﷺ أبا العاص أن يرسل زينب رضي الله عنه ا مع رجل لم يكن لها محرماً، ومجيء عائشة رضي الله عنها في قصة الإفك. (حاشية فيض الباري: ۲/۳۹۷).

حضرت مولانا اشرف علی تھانوی رحمہ اللہ تعالی نے ایک استفسار کے جواب میں تحریر فرمایا:
حنفی مذہب میں تو اس صورت میں بھی اجازت نہیں اور شافعی مذہب میں اگر ثقہ عورتیں ہمراہ ہوں تو اجازت ہے اور حنفی کو کسی خاص مسئلہ میں شافعی کی تقلید بوقتِ ضرورت جائز ہے، ضرورت کا فیصلہ میں نہیں کر سکتا ۔ اشرف علی ۲۳/رمضان ۱۳۵۷؁ھ ۔ (مجالس حکیم الامت: ص ۲۹۰، مرتب حضرت مفتی محمد شفیع صاحب رحمہ اللہ تعالی) ۔
بعض حضرات نے حدیث
"لترين الظعينة ترتحل من الحيرة حتى تطوف بالكعبة لا تخاف الا الله" (بخاري: ۱/۵۰۷)
کی روشنی میں فتنہ نہ ہونے کی صورت میں عورت کے لیے تنہا سفر کی گنجائش بیان کی ہے ۔
نوٹ: یا در ہے کہ یہ ایک توجیہ کے مطابق ہے ورنہ اس حدیث سے استدلال اور اس کا جواب ذکر کیا جا چکا، لہذا تعارض نہ سمجھا جائے ۔
واللہ سبحانہ و تعالی اعلم