اجنبی عورت کے ساتھ نا جائز تعلقات کی بنا پر فسخ کا حکم:

بصورتِ مسئولہ عورت کا بیان صحیح ثابت ہو جائے تو عورت کو طلاق کا مطالبہ کرنے کا حق حاصل ہوگا، اور طلاق نہ ملنے کی صورت میں جمعیت العلماء کے سامنے مقدمہ پیش کر دے وہ حضرات تحقیق حال کے بعد اگر شوہر حقوق ادا نہیں کرتا اور ناجائز تعلقات سے بھی باز نہیں آتا تو نکاح فسخ کرنے کے مجاز ہوں گے ۔
ملاحظہ فرمائیں مجموعہ قوانین اسلامی میں ہے:
اگر شوہر زوجہ کو برا بھلا کہے، گالی دے جو عورت کے لئے انتہائی تحقیر اور اذیت کا باعث ہو، شدید زد و کوب کرے تو اس کو حق تفریق حاصل ہوگا ۔
قرآن مجید میں
﴿ولا تمسكوهن ضراراً لتعتدوا، ومن يفعل ذـلك فقد ظلم نفسه﴾. (سورة البقرة: ۲۳۱).
وارد ہوا ہے، ظاہر ہے کہ ضرب شدید اور گالی گلوچ سے بڑھ کر ضرر رساں بات اور کیا ہو گی ۔ (مجموعہ قوانین اسلامی، ص: ۱۹۹، دفعہ ۸۱) ۔
نیز مذکور ہے:
اگر زوجین کے درمیان شدید نفرت پیدا ہو جائے کہ دونوں کا اللہ کے حدود کو قائم رکھتے ہوے ازدواجی زندگی گزارنا ممکن نظر نہ آئے تو ایسی صورت میں:
(الف) قاضی حکمین مقرر کرے گا، تاکہ اصلاح کی صورت نکل سکے ۔
(ب) اگر تحکیم کے باوجود اصلاح حال یا باہمی رضامندی سے علیحدگی کی کوئی صورت نہیں نکل سکے تو قاضی بر بنائے شقاق، زوجہ کے مطالبہ کی صورت میں تفریق کر دے گا ۔ (مجموعہ قوانین اسلامی، ص: ۲۰۰، دفعہ ۸۲) ۔
مزید دلائل مسئلہ "شقاق کی وجہ سے فسخ تفریق" کے تحت ملاحظہ فرمائیں ۔
واللہ سبحانہ و تعالی اعلم