مرد کے لیے پلاٹینم کی انگشتری کا حکم:

پلاٹینم کے بارے میں اہل لغت کا خیال ہے کہ یہ تین قیمتی دھاتوں (سونا، چاندی، پلاٹینم) میں سے ایک قیمتی دھات ہے اور یہ تینوں میں سے ایک انوکھی قسم ہے، اور دوسری دھاتوں سے زیادہ سخت ہے جلد پگھلنے والی نہیں ہے، اس کا رنگ سفید چاندی کی طرح ہوتا ہے ۔ اس کو وائٹ سلور (silver white) یا سفید سونا بھی کہتے ہیں ۔
بایں وجہ چاندی کے حکم میں ہو کر اس کے استعمال کی اجازت ہونی چاہیے، لیکن چونکہ اس کا چاندی ہونا محقق نہیں اس لیے اس کے استعمال سے اجتناب کرنا اولی ہے ۔ کیوں کہ عام فقہائے احناف نے چاندی کے علاوہ کسی اور دھات کی انگوٹھی کو مرد کے لیے مکروہ قرار دیا ہے ۔

قال في فتاوى قاضيخان: ولا يتختم الرجل إلا بفضة أما لا يتختم بالذهب للحديث المعروف وكذا التختم بالحديد لأنه خاتم أهل النار. (فتاوى قاضيخان على هامش الفتاوى الهندية: ۳/٤۱۳، باب ما يكره من الثياب والحلي والزينة ومالا يكره).
عن إياس بن الحارث بن المعيقيب عن جده أنه قال: كان خاتم رسول الله ﷺ من حديد ملوي عليه فضة قال: وربما كان في يدي. (رواه النسائي: ۸/۵۵٦).

حضرت گنگوہی رحمه الله نے بھی دوسری دھاتوں کی انگوٹھی کو مکروہِ تنزیہی قرار دیا ہے ۔
واللہ سبحانہ و تعالی اعلم