قرض پر زکوٰۃ کا حکم:

(۱) جس وقت قرض وصول ہو جائے اس وقت گذشتہ تین سالوں کی زکوٰۃ دینا بھی واجب ہے۔
(۲) جس وقت جس قدر قرض وصول ہو جائے اس رقم پر زکوٰۃ ادا کرنا ضروری ہے۔
ملاحظہ ہو مراقی الفلاح میں ہے:

وزكاة الدين على أقسام: فإنه قوي ووسط وضعيف؛ فالقوي هو بدل القرض ومال التجارة إذا قبضه وكان على مقر ولو مفلساً أو على جاحد عليه بينة زكاه لما مضى ويتراخى وجوب الأداء إلى أن يقبض أربعين درهماً، ففيها درهم، لأن ما دون الخمس من النصاب عفو لا زكاة فيه وكذا فيما زاد بحسابه. (مراقي الفلاح: ۲٦۲، كتاب الزكاة، بيروت، كذا في الشامي: ۲/۳۰۵، سعيد).

محیطِ برہانی میں ہے:

إذا قبض منها أربعين درهماً يجب عليه الأداء بقدر ما قبض، هذا كله قول أبي حنيفة رحمه الله. (المحيط البرهاني: ۳/۲٤٦).

فتاوی دار العلوم دیوبند میں ہے:
بعد وصول قرضہ کے زکوٰۃ دینا واجب ہوتا ہے لیکن اگر قبل از وصول دے دی جائے تو یہ بھی جائز ہے جو قرضہ اب قابلِ وصول ہے اور بعد میں شاید قابلِ وصول نہ رہے اس میں بھی یہی حکم ہے جو گزرا کہ زکوٰۃ کا ادا کرنا واجب اسی وقت ہوتا ہے جب وصول ہو جاوے لیکن اگر فی الحال دے دے گا تب بھی درست ہے، اور قرض اگر باقساط وصول ہو تو جس قدر وصول ہوتا جاوے اس کی زکوٰۃ ادا کرتا جائے اور اگر ایک دفعہ کل کی زکوٰۃ دے دے خواہ پہلے یا پیچھے یہ بھی درست ہے۔ (فتاوی دار العلوم دیوبند: ٦/۹٦ مدلل و مکمل، دار الاشاعت)۔
جدید فقہی مسائل میں ہے:
وہ قرض جو کسی شخص کو دیا گیا ہو تاجر نے وہ سامان جو تجارت ہی کے لئے تھا بیچا ہو اور اس کی قیمت باقی ہو اگر یہ رقم کل کی کل ایک ساتھ مل جائے تو سبھوں کی زکوٰۃ ادا کرنی ہو گی اور اگر کئی سالوں کے بعد ملی تو تمام سالوں کی بہ یک وقت ادا کی جائے گی، اگر یہ رقم تھوڑی تھوڑی وصول ہو تو جتنا روپیہ وصول ہو اتنے کی زکوٰۃ ادا کرتا جائے، لیکن اگر یہ رقم نصابِ زکوٰۃ کے ۵/۱ سے بھی کم ہو تو پھر زکوۃ واجب نہیں ہو گی، اس کو فقہ کی اصطلاح میں دینِ قوی کہتے ہیں۔ (جدید فقہی مسائل: ۱/۲۱۲، نعیمیہ)۔
واللہ سبحانہ و تعالی اعلم