زکوٰۃ کی رقم سے مکان بنا کر فقیر کو اس کا مالک بنانے کا حکم:

صورتِ مسئولہ میں مکان فقیر کے نامزد کر دیا اور اس مکان کے کاغذات فقیر کو دے کر مالک بنا دیا تو زکوٰۃ ادا ہو گئی ۔
لیکن ضروری ہے کہ مکان بنانے کے بعد اس کی مارکیٹ ویلیو کے مطابق قیمت متعین کرے ایسا نہ ہو کہ مکان پر دو لاکھ کا خرچہ آیا اور مارکیٹ میں اس کی قیمت ڈھائی لاکھ ہے، اور زکوٰۃ دینے والے نے اس کی قیمت ۳ لاکھ لگائی بلکہ اس کی قیمت عام بازار کے مطابق لگائے، ہاں اس میں یہ خرابی پائی جاتی ہے کہ ایک فقیر کو مقدارِ نصاب سے زیادہ دیا گیا، لیکن فقیر کی ضرورت کی وجہ سے اور ان کے بال بچوں کی رہائش فراہم کرنے اور ایک اہم ضرورت پورا کرنے کے پیشِ نظر امید ہے کہ اللہ تعالی اس عمل کو قبول فرما کر اجر عطا فرمائیں گے ۔
در مختار میں ہے:

هي تمليك خرج الإباحة، فلو أطعم يتيماً ناوياً الزكاة لا يجزيه إلا إذا دفع إليه المطعوم لأنه بالدفع إليه بنية الزكاة يملكه
۔
(الدر المختار مع الشامي: ۲/۲۵۷، كتاب الزكاة، سعيد)
۔
مزید ملاحظہ ہو:
حاشية الطحطاوي على مراقي الفلاح: ۷۱٤، قديمي
۔
والبحر الرائق: ۲/۳۵۳، كوئته)
۔
احسن الفتاوی میں ہے:
اگر رقم مسکین کو نہیں دی بلکہ اس رقم سے مکان بنوا کر دیاتو اس میں کراہت نہیں اس لئے کہ اس سے مسکین صاحبِ نصاب نہیں ہوا ۔ (احسن الفتاوی: ٤/۲۹۰) ۔
ایضاح المسائل میں ہے:
کسی نے زکوٰۃ کی رقم اصل مال سے الگ نہیں کیا اور مجموعہ رقم سے ذاتی طور پر ایک مکان تعمیر کر کے جو رقم خرچ ہوئی اس کا حساب لگا کر زکوٰۃ کی نیت سے کسی نادار بے گھر فقیر کو مالک بنا کر فقیر کے نام رجسٹری کرا کے قبضہ دلا دیا اور اس میں اپنا کوئی تعلق باقی نہیں رکھا تو اس طرح مکان بنا دینا بلا کراہت جائز اور درست ہے اس لئے کہ فقیر کو اس سے مالدار صاحبِ نصاب نہیں بنایا گیا، بلکہ صرف ضرورت کا مکان فراہم ہوا ہے ۔ (ایضاح المسائل: ص ۱۱۵، نعیمیہ) ۔