"جاؤ تم آزاد ہو، آزاد کرتا ہوں" کہنے کا حکم:

بصورتِ مسئولہ اگر شوہر نے واقعی سوال میں درج شدہ الفاظ کہے ہوں تو اس کی بیوی پر ایک طلاقِ بائن واقع ہو گئی، ان الفاظ سے طلاقِ بائن کا واقع ہونا دو وجہ سے ہے، ایک تو اس لیے کہ یہ الفاظ عرف میں طلاق کے لیے استعمال کیے جاتے ہیں، علامہ شامی رحمه الله نے "
أنت على حرام"
یعنی تو مجھ پر حرام ہے، کے متعلق لکھا ہے کہ لوگوں کے عرف کی وجہ سے اس سے طلاقِ بائن پڑتی ہے ۔
مفتی رشید احمد صاحب لدھیانوی رحمه الله تحریر فرماتے ہیں: تیسرا جملہ "میں نے آزاد کر دیا" طلاقِ صریح بائن ہے، لہذا اس سے طلاق کی نیت ہو یا نہ ہو ایک طلاقِ بائن واقع ہو گئی ۔ (احسن الفتاوی۵/۲۰۲) ۔
دوسری وجہ یہ ہے کہ پہلے سے طلاق کی بات چل رہی تھی یعنی "تمہاری کیا اوقات ہے، طلاق دینے میں ایک منٹ لگتا ہے، تم آزاد ہونا چاہتی ہو، جاؤ تم آزاد ہو، آزاد کرتا ہوں تجھے" لہذا بیوی پر ایک طلاقِ بائن واقع ہوئی ۔ غالباً طلاق کے بعد عدت تو گزر چکی ہو گی، کیوں کہ جس عورت کو ماہواری آتی ہو، اس کی عدت تین ماہواریوں کا گزرنا ہے ۔ اگر عدت گزر گئی ہو تو عورت کسی اور جگہ نکاح کر سکتی ہے، اور سابقہ شوہر سے بھی نکاح ہو سکتا ہے، کسی قسم کے حلالہ کے ضرورت نہیں ۔ اگر شوہر ان الفاظ سے انکاری ہو اور بیوی کے پاس شرعی گواہ نہ ہو تو شوہر پر قسم آئے گی، اگر اس نے نہ کہنے کی قسم اٹھائی تو شوہر کی بات مانی جائے گی، لیکن بیوی کو جب ان الفاظ کے کہنے کا یقین ہے تو وہ شوہر کو اپنے پاس بغیر نکاحِ جدید کے نہ چھوڑے ۔ اگر سابقہ شوہر سے دو بارہ نکاح ہو جائے تو آئندہ اس کو صرف دو طلاق دینے کا حق حاصل ہوگا، اگر کسی وقت دو طلاقیں دے دے تو بیوی مغلظہ ہو جائے گی ۔
واللہ سبحانہ و تعالی اعلم