"تقریر سنوں تو میری بیوی کو طلاق" کہنے کا حکم:

بصورتِ مسئولہ اگر ٹیپ ریکارڈ سے بیان سنا تو زید کی بیوی پر طلاق نہیں پڑے گی اس لیے کہ اس نے تقریر و بیان کا عکس سنا بعینہٖ بیان نہیں سنا جیسے ٹیپ ریکارڈ سے آیتِ سجدہ سننے سے سجدۂ تلاوت لازم نہیں ہوتا یا آوازِ بازگشت سے سجدۂ تلاوت لازم نہیں ہوتا، مسئلہ طلاق بھی اسی طرح ہے ۔
ملاحظہ ہو آلاتِ جدیدہ کے شرعی احکام میں ہے:
ٹیپ ریکارڈ کے ذریعہ جو آیتِ سجدہ سنی جائے اس کا وہی حکم ہے جو گراموفون کے ریکارڈ کا کہ اس کے سننے سے سجدۂ تلاوت واجب نہیں ہوتا، کیوں کہ سجدۂ تلاوت کے وجود کے لیے تلاوتِ صحیحہ شرط ہے اور آلہ بے جان بے شعور سے تلاوت مقصود نہیں ۔ (آلاتِ جدیدہ کے شرعی احکام، ص ۲۲۳) ۔
مزید تفصیل کے لیے ملاحظہ ہو: (
حاشية الطحطاوي على مراقي الفلاح، ص ٤۸٦
، و نظام الفتاوی: ۱/۷۲، و فتاوی محمودیہ: ۷/٤۷۲، و احسن الفتاوی: ٤/٦۵، و فتاوی دار العلوم زکریا: ۲/٤۷۸) ۔
نوٹ: عام طور پر کتابوں میں مرقوم ہوتا ہے کہ تعلیق الطلاق میں یمین پوشیدہ ہے سو وہ اس طور پر کہ جس طرح یمین توڑنے سے اس پر کفارہ مرتب ہوتا ہے، اسی طرح تعلیق کے بعد طلاق مرتب ہوتی ہے، ورنہ تعلیق طلاق میں حقیقی و اصطلاحی یمین نہیں ہے، لہذا طلاق کا مدار حقیقت پر ہوگا اور تقریر کا عکس سننے سے طلاق واقع نہ ہو گی، برخلاف یمین کے کہ کتاب الایمان میں یہ مسئلہ مذکور ہے کہ تقریر کا عکس سننے سے حانث ہو جائے گا ۔
واللہ سبحانہ و تعالی اعلم