کیرم بورڈ کھیلنے کا حکم:

کیرم بورڈ میں بذاتِ خود کوئی قباحت نہیں ہے، ہاں بعض اوقات اس میں انہماک اتنا ہو جاتا ہے کہ اس کی وجہ سے فرائض سے غفلت ہونے لگتی ہے، یہ انہماک ممنوع ہے، ورنہ اگر محض تفریح کے لیے کچھ دیر کھیل لیا جائے جیسا کہ سوال میں مذکور ہے تو یہ جائز اور درست ہے ۔
حضرت مفتی محمد شفیع صاحب احکام القرآن میں فرماتے ہیں:

اعلم أن الشريعة المصطفوية السمحة البيضاء لا تمنع الارتفاقات المصالح التي فطرت عليها الطبيعة البشرية ولا ترتضي الرهبانية والتبتل، بل تقتضي المدنية والمعاشرة الصالحة، نعم: تمنع الغلو في المسليات والانهماك فيها بحيث يلهي عن الضروريات الدينية أو المعاشية، ومن المعلوم أن من الحاجات المفطور عليها الإنسان تمرين البدن وترويح القلب وتفريحه ساعة فساعة، ومن ههنا قال عليه الصلاة والسلام: "روحوا القلوب ساعة فساعة"، أخرجه أبو داود في مراسيله عن ابن شهاب مرسلاً، وأبو بكر المقري في فوائده، والقضاعي عنه عن أنس رضي الله عنه. (أحكام القرآن: ۳/۱۹٤).

کفایت المفتی میں ہے:
اگر کیرم میں بازی (یعنی ہار جیت کی کوئی قیمت) نہ لگائی جائے محض تفریح کی غرض سے تھوڑی دیر کھیل لیا جائے اور اس کی وجہ سے کسی ضروری اور مذہبی کام میں خلل نہ آئے تو مباح ہو گا ۔ (کفایت المفتی: ۹/۲۰٤، دار الاشاعت) ۔
فتاوی محمودیہ میں ہے:
اگر ہار جیت نہ ہو اور احکامِ شرعیہ میں اس کی وجہ سے خلل نہ آئے تو کبھی کبھی وحشت اور دل بہلانے کے لیے اس کھیل (کیرم) کی گنجائش ہے، تاہم اس کی عادت نہ ڈالی جائے، اور اس کو چھوڑنے کی کوشش کی جائے ۔ (فتاوی محمودیہ: ۱۹/۵۳٦، جامعہ فاروقیہ) ۔
واللہ سبحانہ و تعالی اعلم