حضرت مہدی رضی اللہ عنہ کی نماز ِ جنازہ کون پڑھائے گا؟

کتبِ احادیث کی ورق گردانی کے باوجود کسی حدیث میں یہ بات دستیاب نہیں ہوئی کہ حضرت مہدی رضی الله عنه کی نماز ِ جنازہ حضرت عیسی علی نبینا و علیہ الصلاۃ و السلام پڑھائیں گے، ہاں ابو داود شریف کی روایت میں فقط اتنی بات مذکور ہے کہ مسلمان ان کی نماز ِ جنازہ پڑھیں گے۔ البتہ بعض علما سے مروی ہے کہ حضرت عیسی علیہ السلام ان کی نمازِ جنازہ پڑھائیں گے۔ ابو داود شریف کی روایت ملاحظہ کیجیے:

عن أم سلمة رضي الله عنه زوج النبي ﷺ عن النبي ﷺ قال: يكون اختلاف عند موت خليفة فيخرج رجل من أهل المدينة هارباً إلى مكة فيأتيه ناس من أهل مكة

فيلبث سبع سنين ثم يتوفى ويصلي عليه المسلمون. قال أبو داود: قال بعضهم عن هشام "تسع سنين" وقال بعضهم: "سبع سنين". (رقم الحديث، ٤۲۸٦).

لیکن شیخ شعیب الارنؤوط نے اپنی تعلیقات میں لکھا ہے کہ یہ روایت ضعیف ہے۔
شیخ مرعی بن یوسف مقدسی حنبلی اپنی کتاب
"فرائد فوائد الفكر"
میں لکھتے ہیں:
قال: ذكر العلماء أن المهدي يستمر مع عيسى عليه السلام إلى بيت المقدس، فيموت بها، ويصلي عليه هو ومن معه من المسلمين. (فرائد فوائد الفكر في الامام المهدي المنتظر، ص ۳۳۳).

حضرت شاہ رفیع الدین دہلوی رحمه الله آثارِ قیامت میں لکھتے ہیں:
واضح رہے کہ حضرت مہدی رضی الله عنه کو سات سال عیسائیوں کے فتنہ کو پامال کرنے اور ملک میں عدل و انصاف قائم کرنے میں صرف ہوں گے، اور آٹھواں سال دجال سے جنگ و جدال میں گزرے گا اور نواں سال حضرت عیسی علیہ السلام کے ساتھ گزرے گا، اس حساب سے آپ کی عمر ٤۹ سال ہو گی، اس کے بعد حضرت مہدی رضی الله عنه کا وصال ہو جائے گا، حضرت عیسی علیہ السلام آپ کی نمازِ جنازہ پڑھائیں گے اور آپ کو قبر میں اتاریں گے۔ (آثارِ قیامت، ص
۳٤
)۔
حضرت شاہ رفیع الدین صاحب کے حوالہ سے فتاوی حقانیہ میں بھی مرقوم ہے۔ ملاحظہ ہو۔ (فتاوی حقانیہ:
۱
/
۳۰٤
)۔
واللہ سبحانہ و تعالی اعلم