اذان کے بعد ہاتھ اٹھا کر دعا کرنا :

جن دعاؤں کے لیے مخصوص الفاظ وارد ہوے ہیں اور ان میں خصوصیت سے رفع یدین ثابت نہیں وہ دعائیں اذکار کے حکم میں ہیں ان کے لیے ہاتھ نہ اٹھانا بہتر ہے جیسے اذان کے بعد کی دعا اور کھانے پینے اور بیت الخلاء کی دعائیں ۔
ملاحظہ ہو فیض الباری میں ہے:

(باب الدعاء عند النداء) والمسنون في هذا الدعاء ألا ترفع الأيدي، لأنه لم يثبت عن النبي ﷺ رفعها والتشبث فيه بالعمومات بعد ما ورد فيه خصوص فعله ﷺ لغو، فإنه لم يرد فيه خصوص عادته ﷺ لنفعنا التمسك بها، وما إذا نقل إلينا خصوص الفعل فهو الأسوة الحسنة لمن كان يرجو الله والدار الآخرة. (فيض الباري: ۲/۱٦۷، باب الدعاء عند النداء)

احسن الفتاوی میں ہے:
دعا کی دو قسمیں ہیں: (۱) بدونِ توظیف الفاظ مخصوصہ مطلق کوئی حاجت طلب کرنا (۲) الفاظِ مؤظفہ خواہ کسی خاص وقت سے متعلق ہوں یا مطلق ہوں، رفعِ یدین کی احادیث قسمِ اول سے متعلق ہیں قسمِ دوم سے متعلق نہیں،
إلا ما ورد فيه النص
، چنانچہ بعد وضو، مسجد میں دخول و خروج، گھر میں دخول و خروج، بیت الخلاء میں دخول و خروج وغیرہ ادعیہ ماثورہ میں کوئی بھی رفعِ یدین کا قائل نہیں ۔ (احسن الفتاوی: ۲/۲۹۸)
فتاوی دار العلوم دیوبند میں ہے:
خصوصیت کے ساتھ اس موقع پر رفع یدین ثابت نہیں ۔ (فتاوی دار العلوم دیوبند: ۲/۱۱۰، از مفتی عزیز الرحمٰن صاحب رحمه الله) ۔
واللہ سبحانہ و تعالی اعلم