منگنی کے بعد بات چیت کا سلسلہ جاری رکھنے کا حکم:

شریعتِ مطہرہ نے بوقت ضرورت بات کرنے کی اجازت دی ہے اور جب رشتہ طے ہو گیا تو یہ ضرورت پوری ہو گئی اب بات چیت کا سلسلہ جاری رکھنے میں کوئی ضرورت نہیں ہے، نیز اپنی مخطوبہ کے ساتھ نکاح سے پہلے مزے لے کر بات چیت کرنا شریعت کی نگاہ میں پسندیدہ نہیں ہے اور اس سے بڑی خطرناک حالت یہ ہے کہ بہت سی جگہوں پر دیکھا گیا کہ شادی سے قبل اپنی مخطوبہ کو کار میں لے گھومتے ہیں اس میں خلوت بھی ہے، یہ بالکل جائز نہیں، یہ بات ذہن نشین کر لینا چاہیے کہ مخطوبہ اجنبیہ کے حکم میں ہے ۔
ملاحظہ ہو در مختار میں ہے:

ولا يكلم الأجنبية. (الدر المختار: ٦/۳٦۹، سعيد).

مجموعہ قوانین اسلامی میں ہے:
ان دونوں کا شادی سے پہلے تنہائی میں یکجا ہونا حرام ہے ۔
وفي الأشباه: الخلوة بالأجنبية حرام. "الدر المختار: ۳/۳۲۳". (
مجموعہ قوانین اسلامی: ص۳۷، دفعہ ۱۱مع الحاشیہ) ۔
آپ کے مسائل میں ہے:
نکاح سے پہلے منگیتر اجنبی ہے، لہذا نکاح سے پہلے منگیتر کا حکم بھی وہی ہو گا جو غیر مرد کا ہے کہ عورت کا اس کے ساتھ اختلاط جائز نہیں اور معاشرے میں کسی چیز کا رواج ہو جانا کوئی دلیل نہیں ایسا غلط رواج جو شریعت کے خلاف ہو خود لائق اصلاح ہے، نیز زیادہ تعلقات کی نکاح سے قبل اجازت نہیں، نہ میل جول کی اجازت ہے اور نہ خلوت و تنہائی کی، نکاح سے قبل ملنا جلنا ب جائے خود غیر اخلاقی حرکت ہے ۔ (آپ کے مسائل اور ان کا حل: ۵/۳٤، ۳۵) ۔
واللہ سبحانہ و تعالی اعلم