شادی کے ارادہ سے لڑکی کو خطوط لکھنے کا حکم:

شریعتِ مطہرہ میں شادی کے ارادہ سے دیکھنے اور مختصر بات کرنے کی اجازت ہے تو پھر خط لکھنا بھی شرعاً درست ہے، ہاں لطف اندوزی اور ٹائم پاس نہ ہو، نیز جس طرح دیکھنے کے وقت تاکید کی گئی ہے کہ لڑکا اور لڑکی شرعی حدود کی رعایت کریں، اسی طرح خط لکھتے وقت بھی شرعی حدود کی رعایت ضروری ہے، جب احادیث مبارکہ سے دیکھنے کی اجازت ہے تو خط لکھنا اس سے کم درجہ ہے، نیز خط کے ذریعہ جب ضروری معلومات حاصل ہو جائے تو سلسلۂ خطوط بند ہو جانا چاہیے ۔
(۲) لڑکی کو پہچان لیا اور ضروری معلومات حاصل ہو گئی تو اب خط لکھنا درست نہیں چاہے محبت و عشق کی بات ہو یا نہ ہو اس لیے کہ جب تک عقد نکاح نہیں ہوا اجنبیہ کے حکم میں ہے ۔
طحطاوی میں ہے:

قوله والنظر إليها قبله، أي فإنه مندوب، لأنه داعية للألفة فينظر إلى وجهها وكفيها وإن لم تأذن له هي أو وليها إذا علم أنه يجاب في نكاحها. (حاشية الطحطاوي على الدر المختار: ۲/۵، كوئته).

واللہ سبحانہ و تعالی اعلم