بغیر گواہوں کے نکاح کرنے کا حکم:

صورتِ مسئولہ میں بغیر گواہوں کے نکاح جائز اور درست نہیں ہے، ہاں یہ کر سکتے ہیں کہ کسی دوسرے ملک میں فون کے ذریعہ سے وکیل بنا دے پھر وکیل مجلس نکاح میں گواہوں کے سامنے ان دونوں کی طرف سے نکاح پڑھا دے، اور ان کو اطلاع دے دے، اس صورت میں ایک شخص جانبین کا وکیل بن سکتا ہے یا علیحدہ وکیل ہو تب بھی صحیح ہے ۔
دوسری صورت یہ ہو سکتی ہے دونوں مسلمانوں کے ملک کا سفر کر لے اور وہاں جا کر مسلمانوں کے اجتماع میں نکاح کر لیں ۔
فتاوی عالمگیری میں ہے:

أجمع أصحابنا أن الواحد يصلح وكيلاً في النكاح من الجانبين. (الفتاوى الهندية: ۱/۲۹۹)

در مختار میں ہے:

ويتولى طرفي النكاح واحد بإيجاب يقوم مقام القبول في خمس صور كأن كان ولياً أو وكيلاً من الجانبين، وفي الشامي: قوله ولياً أو وكيلاً من الجانبين كزوجت ابني بنت أخي أو زوجت موكلي فلا ناً أو موكلتي فلانة، قال ط: ويكفي شاهدان على وكالته، ووكالتها وعلي العقد لأن الشاهد يتحمل الشهادات العديدة، وقدمنا أن الشهادة على الوكالة لا تلزم إلا عند الجحود. (الدر المختار مع الشامي: ۳/۹٦، سعيد).

فتاوی فریدیہ میں ہے:
نکاح میں ایک آدمی طرفین کا قائم مقام ہو سکتا ہے ۔ (فتاوی فریدیہ: ٤/۳۹۲) ۔
فتاوی دار العلوم دیوبند میں ہے:
سوال: ایک شخص نے بذریعہ تار اپنے مرشد کو اطلاع دی کہ میرا نکاح فلاں عورت کے ساتھ پڑھا دیا جائے، اس صورت میں کیا حکم ہے؟
الجواب: مرشد اس حالت میں نکاح پڑھا سکتا ہے، اور ایجاب و قبول اس فریق کی طرف سے کر سکتا ہے جس نے بذریعہ خط یا تار کے اجازت دی ہے ۔ (فتاوی دار العلوم دیوبند: ۷/۱٤۰) ۔
مجموعہ قوانین اسلامی میں ہے:
ایک ہی شخص مرد و عورت دونوں کی طرف سے وکیل ہو سکتا ہے ۔ (مجموعہ قوانین اسلامی: ۸٦، دفعہ ۹۹) ۔
واللہ سبحانہ و تعالی اعلم