ڈرامہ میں حکایۃً طلاق دینے سے وقوع طلاق کا حکم:

حضرت مفتی ولی حسن صاحب رحمہ اللہ تعالیٰ فرماتے تھے کہ اس میں طلاق واقع نہیں ہوتی، کیوں کہ یہ طلاق حکایت اور نقل کے طور پر ہے، گویا مجنون نے لیلیٰ کو طلاق دی یا فرہاد نے شیرین کو طلاق دی، جو فرضی واقعہ کی تصویر ہے یہ انشاء طلاق نہیں، دوسروں سے حکایت اور نقل ہے، جیسے صاحبِ مقامات نے ابو زید سروجی اور حارث بن ہمام کی حکایات کو فرضی طور پر نقل فرمایا، اس لیے صاحبِ مقامات پر جھوٹ کا گناہ بھی نہیں، کیوں کہ فرضی حکایات کسی امر واقع کی غلط خبر نہیں ۔
ملاحظہ فرمائیں الفقہ الاسلامی و ادلتہ میں ہے:

يشترط بالاتفاق القصد في الطلاق وهو إرادة التلفظ به ولو لم ينوه فلا يقع طلاق فقيه يكرره ولا طلاق حاك عن نفسه أو غيره لأنه لم يقصد معناه، بل قصد التعليم والحكاية. (الفقه الإسلامي وأدلته: ۷/۳٦۸، شروط الطلاق، دار الفكر).

فتح القدیر میں ہے:

لو كرر مسائل الطلاق بحضرة زوجته ويقول: أنت طالق ولا ينوى طلاقاً لا تطلق. (فتح القدير: ٤/٤، باب إيقاع الطلاق، دار الفكر).

مزید ملاحظہ فرمائیں: (الاشباہ و النظائر: ۱/۹۱ ۔ و فتاوی دار العلوم دیوبند: ۹/۲۸٤، مدلل و مکمل ۔ و فتاوی محمودیہ: ۱۲/۲٤۹، مبوب و مرتب) ۔
واللہ سبحانہ و تعالی اعلم