سودی کمپنی کے ساتھ معاملہ کرنے کا حکم:

بصورتِ مسئولہ اگر زید نے مشین ایک لاکھ رینڈ میں مثلاً کمپنی کی وساطت سے خریدی اور کمپنی نے ایک لاکھ ادا کیا اور اب کمپنی اقساط میں ایک لاکھ بیس ہزار وصول کرے گی تو یہ سود ہے، اگر چہ اس کا نام کرایہ رکھے اور اگر کمپنی نے مشین ایک لاکھ میں خریدی اور زید کو ایک لاکھ بیس ہزار مؤجل میں مثلاً فروخت کی تو یہ مرابحہ ہے اور یہ جائز ہے ۔
اور اگر مشین کمپنی کی رہے گی اور زید اس کو متعین کرایہ ہر ماہ دیتا رہے گا اور کچھ مدت مقررہ کے بعد زید مشین واپس کر دے یا کمپنی زید کو کم قیمت پر بیچ دے یا ہبہ کر دے تو اس کی بھی گنجائش ہے ۔
رہا کمپنی کے سودی کاروبار کا معاملہ تو یہ اس کا اپنا فعل ہے اس سے خریداری متاثر نہ ہو گی، کیوں کہ غیر مسلم کمپنی غیر مسلم ممالک میں سودی رقم سے مشین خریدتی ہے اور ہم ان کو اسلامی احکام پر مجبور نہیں کر سکتے، کیوں کہ وہاں اسلامی حکومت نہیں ہے، پھر اس میں مسلمان براہِ راست سود کے لین دین میں ملوث نہیں ہے، اور مسلمان کا سود سے کوئی تعلق بھی نہیں ہے تو ایسی کمپنی کے ساتھ معاملہ کرنے کی گنجائش ہے ۔
واللہ سبحانہ و تعالی اعلم