تبلیغی حضرات پر اعتراض اور اس کا جواب:

اول تو یہ کہ تبلیغی حضرات نے اس تبلیغ کے عظیم کام کو صرف مسلمانوں کے لیے خاص نہیں کیا بلکہ ان کی چلت پھرت اور اس کام کی برکت سے بے شمار غیر مسلموں کو اللہ تعالی نے ایمان جیسی عظیم دولت سے سرفراز فرمایا بالفرض اگر ہم مان لیں کہ کفار کے پاس نہیں جاتے تو بھی ان کا مسلمانوں کے پا س جانا اور کفار کے پا س نہ جانا یہ آیتِ کریمہ کے خلاف نہیں ہے، بلکہ اس عمل کے ثبوت میں بہت ساری احادیث موجود ہیں مثلاً نبی کریم ﷺ نے حضرت معاذ بن جبل رضي اللہ عنہ کو یمن کی طرف بھیجا، نیز صحابہ کی جماعت کوفہ کی طرف گئی مسلمانوں کی دعوت کے لیے اسی طرح حضرت عمر رضي اللہ عنہ نے حضرت عبد اللہ بن مسعود رضي اللہ عنہ کو صحابہ کی جماعت کے ساتھ اپنی خلافت کے زمانے میں کوفہ کی طرف روانہ فرمایا اور معقل بن یسار، عبد اللہ بن مغفل اور عمران بن حصین بصرہ کی طرف تشریف لے گئے اور عبادہ بن صامت اور ابو الدرداء رضي اللہ عنہ شام کی طرف گئے اہلِ اسلام اور مسلمانوں کی دعوت کے لیے تھا ۔
نیز مسلمانوں میں دعوت و تبلیغ کا فائدہ بنسبت غیر مسلموں کے جلدی ظاہر ہو جاتا ہے
﴿عبس وتولي أن جاءه الأعمى﴾
میں اس طرف اشارہ موجود ہے کہ ابن ام مکتوم کا لحاظ رکھنا قریش کے متکبر سرداروں کے مقابلے میں بہتر اور مفید ہے ۔
اس کے باوجود اگر کسی کو اشکال ہو تو ان حضرات نے کسی کو روکا تو نہیں ہر ایک اپنے طور پر جا سکتا ہے کفار کے پاس اور تبلیغ کر سکتا ہے راستہ کھلا ہے کوئی روک ٹوک نہیں ہے، لہذا ان حضرات کو متہم کرنا صحیح نہیں ہے ۔
تفصیل کے لیے ملاحظہ ہو:
(فتاوی محمودیہ: ۱/٤۵۲، و فتاوی رحیمیہ: ٦/۳۸۱، جماعت تبلیغ پر اعتراضات کے جوابات ص ۱۲، و دینی دعوت اور تبلیغ کے اصول و احکام، و منتخب احادیث) ۔