شے مستعار کے نقصان کی تلافی کا حکم:

بصورتِ مسئولہ زید نے کار معروف طریقے پر استعمال کی اور بلا تعدی کچھ نقصان ہو گیا تو زید اس کا ذمہ دار نہیں، اس پر تاوان نہیں آئے گا، ہاں اگر معروف طریقے سے تجاوز کیا اور تعدی کی تو زید اس کا ذمہ دار ہوگا، اسی طرح متعین رفتار سے زیادہ تیز چلائی اور قوانین کی مخالفت کی اور کوئی خرابی واقع ہو گئی تب بھی زید پر تاوان آئے گا۔
عالمگیری میں ہے:

وأما حكمها (العارية) فهو ملك المنفعة للمستعير بغير عوض أو ما هو ملحق بالمنفعة عرفاً وعادة ً عندنا كذا في البدائع، والعارية أمانة إن هلكت من غير تعد لم يضمنها

ولو تعدي ضمن بالإجماع نحو أن يحمل عليها ما يعلم أنها لا تحمل مثله وكذلك إذا استعملها ليلاً أو نهاراً فيما لا يستعمل فيه الدواب في العرف والعادة، فعطبت ضمن قيمتها كذا في غاية البيان. (الفتاوى الهندية: ٤/۳٦۳، كتاب العارية).

شرح عنایہ میں ہے:

إن هلكت العارية، فإن كان بتعد كحمل الدابة ما لا يحمله مثلها أو استعمالها استعمالاً لا يستعمل مثلها من الدواب أوجب الضمان بالإجماع. (شرح العناية على هامش فتح القدير: ۹/۷، كتاب العارية، دار الفكر).

اسلامی فقہ میں ہے:
اگر معیر نے وقت، جگہ یا طریقہ استعمال کی کوئی قید نہ لگائی ہو، تو مستعیر کو اختیار ہے کہ وہ جس وقت تک چاہے اور جس طرح چاہے استعمال کرے، اس صورت میں اگر کوئی نقصان ہوگا تو مستعیر پر کوئی ذمہ داری نہیں ہے، لیکن اگر عام طور پر جس طرح وہ چیز استعمال کی جاتی ہے، اس کے خلاف استعمال کرے گا، تو اجازت کے باوجود تاوان دینا پڑے گا، مثلاً کسی نے کسی سے سائیکل یا موٹر عاریۃً لی، اس کو مجمع میں بے تحاشا یا اس رفتار سے زیادہ تیز چلانا شروع کر دیا، جو عام طور پر اس کی مقرر ہے، اور وہ ٹکرا گئی تو اس کے نقصان کی ذمہ داری مستعیر پر ہوگی، اسی طرح اس سے ٹکرا کر جس دوسری چیز کا نقصان ہوگا، اس کی ذمہ داری بھی اسی پر ہو گی، مثلاً کسی کو چوٹ لگ گئی، یا کسی کا مالی نقصان ہو گیا تو اس کا تاوان اسی کو دینا پڑے گا۔ (اسلامی فقہ: ۲/٤۹۸، عاریت کا حکم)۔
واللہ سبحانہ و تعالی اعلم