اسکول کے بچوں کے لیے جمعہ کی جماعتِ ثانیہ کا حکم:

مسجد کے صحن میں جمعہ کی جماعتِ ثانیہ قائم کرنا جائز اور درست ہے، البتہ امامِ راتب کو مجبور نہیں کیا جائے گا، بلکہ اگر مسجد میں چند ائمہ ہوں تو باری باری جمعہ پڑھا دے یا مسجد کے امام کے علاوہ کوئی نیک آدمی مختصر خطبہ اور نماز پڑھا دے تب بھی صحیح اور درست ہے۔ ملاحظہ ہو در مختار میں مرقوم ہے:

ولو أمكنه الذهاب إلى إمام آخر فعل لأنها تؤدى بمصر واحد بمواضع كثيرة اتفاقاً فإن عجز صلى أربعاً. (الدر المختار: ۲/۱۷٦، سعيد).

جماعتِ ثانیہ مسجد کے باہر صحن میں جائز ہے، ہاں مسجد کے اندر مکروہ ہے۔ ملاحظہ ہو در مختار میں ہے:

ويكره تكرار الجماعة بأذان وإقامة في مسجد محلة لا في مسجد طريق أو مسجد لا إمام له ولا مؤذن. وفي الشامي: قوله يكره، أي تحريماً لقول الكافي لا يجوز والمجمع لا يباح وشرح الجامع الصغير أنه بدعة كما في رسالة السندي. (فتاوى الشامي: ۱/۵۵۲، سعيد).
وللمزيد راجع: (الفتاوى الهندية: ۱/۸۳، وشرح منية المصلي، ص ٦۱٤، سهيل).

فتاوی محمودیہ میں مرقوم ہے:
سوال: میں اردو گورنمنٹ اسکول ریاست مہاراشٹر میں مدرس ہوں، جمعہ کا وقت ساڑھے دس بجے سے دو بجے تک کے درمیان یعنی اسکول کی مصروفیت میں آتا ہے، اب ہم لوگ اسکول بند کر کے ویسے ہی جمعہ پڑھ لیا کرتے تھے، اب اس کے لیے آفیسر تنگ کرتے ہیں، ایسی صورت میں کیا کیا جائے؟ شام کو مدرسہ ڈھائی بجے سے ساڑھے پانچ بجے تک ہے اور نوکری کے علاوہ کوئی ذریعہ معاش نہیں ہے؟
جواب: کوشش کر کے کوئی ایسی جگہ تجویز کر لیں جہاں ڈھائی بجے جمعہ ہو جاتا ہو، فقط واللہ تعالی اعلم ۔ (فتاوی محمودیہ: ۸/۳٤، جامعہ فاروقیہ)۔
نیز مجموعۃ الفتاوی: ۱/۳۷۲، ط: میر محمد کتب خانہ، و امداد الاحکام: ۱/۷۸۳، و خیر الفتاوی: ۳/۹۵، میں بھی جمعہ کی دوسری جماعت کے جواز کا فتوی موجود ہے۔
واللہ سبحانہ و تعالی اعلم