نامعلوم ظالم کے ہاتھ سے شہید ہونے والے کا حکم:

نامعلوم ظالم کے ہاتھ سے قتل ہونے والا شخص شہید کے حکم میں لہذا اس پر شہداء کے احکام جاری ہوں گے یعنی حنفیہ کے ہاں غسل نہیں دیا جائے گا ۔ مبسوط میں ہے:

ومن صار مقتولاً من جهة قطاع الطريق لم يغسل أيضاً لأنه قتل دافعاً عن ماله وقد قال ﷺ: "من قتل دون ماله فهو شهيد" فلهذا لا يغسل. (المبسوط: ۲/٥۲، باب الشهيد، إدارة القرآن)

ہدایہ میں ہے:

ومن قتله أهل حرب أو أهل البغي أو قطاع الطريق فبأي شيء قتلوه لم يغسل لأن شهداء أحد ما كان كلهم قتيل السيف والسلاح. (الهداية: ۱/۱۸۳، باب الشهيد، شركة علمية. ودرر الحكام شرح غرر الأحكام: ۱/۱٦۹، باب الشهيد)

بہشتی زیور میں ہے: شہید کے جو احکام یہاں بیان کرنا مقصود ہیں وہ اس شہید کے ساتھ خاص ہیں جس میں یہ شرائط پائی جائیں:
(۱) مسلمان ہونا ۔
(۲) مکلف یعنی عاقل بالغ ہونا ۔
(۳) حدثِ اکبر سے پاک ہونا ۔
(٤) بے گناہ مقتول ہونا ۔
(۵) آلہ جارحہ کے ساتھ مارا گیا ہو ۔
(٦) اس قتل کی سزا میں ابتداء ً شریعت کی طرف سے کوئی مالی عوض نہ مقرر ہو بلکہ قصاص واجب ہوا ہو،
(۷)بعد زخم لگنے کے پھر کوئی امرِ راحت و تمتعِ زندگی مثل کھانے پینے سونے دوا کرنے وغیرہ کے اس سے وقوع میں نہ آئے اور نہ بمقدار وقت ایک نماز کے اس کی زندگی حالتِ ہوش و حواس میں گذرے ۔
جس شہید میں یہ سب شرائط پائی جائیں اس کا حکم یہ ہے کہ اس کو غسل نہ دیا جائے اور اس کا خون جسم سے زائل نہ کیا جائے اسی طرح اس کو دفن کر دیں، دوسرا حکم یہ ہے کہ جو کپڑے پہنے ہوے ہو ان کپڑوں کو اس کے جسم سے نہ اتاریں، ہاں اگر اس کے کپڑے عدد مسنون سے کم ہوں تو عدد مسنون کے پورا کرنے کے لیے اور کپڑے زیادہ کر دیے جائیں، اسی طرح زائد کپڑے اتار لیے جائیں اگر کسی شہید میں ان شرائط میں سے کوئی شرط نہ پائی جاوے تو اس کو غسل بھی دیا جائے گا اور مثل دوسرے مردوں کے نیا کفن بھی پہنایا جاوے گا ۔ (بہشتی زیور گیارہواں حصہ: ص ۱۰۰، مدلل و مکمل، دار الاشاعت) ۔
واللہ سبحانہ و تعالی اعلم