۱۰/ لاکھ کے مکان پر زکوٰۃ کا حکم:

جو گھر تجارت کے لئے ہو اس کی قیمت پر زکوٰۃ ہے اور جو مکان کرایہ کے لئے ہو اس کی قیمت پر زکوٰۃ نہیں ہے، ہاں کرایہ دوسری رقم کے ساتھ مل کر بقدرِ نصاب ہو کر سال گزر جائے تو اس پر زکوٰۃ لازم ہو گی ورنہ نہیں ۔
البحر الرائق میں ہے:

ولو آجر عبد ه أو داره بنصاب إن لم يكونا للتجارة لا تجب ما لم يحل الحول بعد القبض في قول أبي حنيفة رحمه الله. (البحر الرائق: ۲/۲۰۸، كويٹه).

در مختار میں ہے:

ولا زكاة على مكاتب

ولا ثياب البدن وأثاث المنزل ودور السكني ونحوها وكذا الكتب. قال الشامي: ونحوها أي كثياب البدن الغير المحتاج إليها وكالحوانيت والعقارات. (الدر مع الشامي: ۲/۲۶۴، ۲۶۵، سعيد).

فتاوی دار العلوم دیوبند میں ہے:
جائداد کی قیمت پر زکوٰۃ لازم نہ ہو گی بلکہ کرایہ کی آمدنی پر جو نصاب کی مقدار کو پہنچ جائے، اور اس پر تنہا یا دیگر رقومِ موجود ہ کے ساتھ سال پورا ہو جائے زکوٰۃ لازم ہو گی ۔ (فتاوی دار العلوم دیوبند: ٦/۱۳۳) ۔
آپ کے مسائل میں ہے:
میرے پاس دو مکان ہیں، ایک میں میں خود رہائش پذیر ہوں اور دوسرا کرایہ پر، تو آیا زکوٰۃ مکان کی مالیت پر ہے یا اس کے کرایہ پر؟
جواب: اس صورت میں زکوٰۃ مکان کی قیمت پر واجب نہیں، البتہ اس کے کرایہ پر جب کہ نصاب کو پہنچے تو زکوٰۃ ہو گی ۔ (آپ کے مسائل اور ان کا حل: ۳/۳۷۱) ۔
کفایت المفتی میں ہے:
مکان پر یا اس کی قیمت پر تو کسی حال میں زکوٰۃ نہیں خواہ رہائش ہو یا نہ ہو (کیونکہ غیر نامی ہے) ہاں اگر مکانات کی تجارت کی جاتی ہو تو بہ حیثیت مالِ تجارت ہونے کے ان کی قیمت پر زکوٰۃ ہو گی ۔
(۲) زکوٰۃ مکان کی قیمت پر نہیں آمدنی پر ہے ۔ (کفایت المفتی: ٤/۲٦۳، ۲٦٤) ۔
ایضاح المسائل میں ہے:
کسی کی ملکیت میں زائد مکان یا دوکان ہے جو کرایہ پر دے رکھا ہے، یا گاڑی، مشین وغیرہ کرایہ پر دے رکھی ہے تو ان کی قیمت پر زکوٰۃ واجب نہیں بلکہ ان کی آمدنی میں سال گزرنے پر زکوٰۃ واجب ہے یا پہلے سے نصاب کے بقدر روپیہ یا چاندی وغیرہ موجود ہے تو مذکورہ اشیاء کی آمدنی پر سال گزرنے کی ضرورت نہیں، بلکہ آمدنی کو سابق رقم کے ساتھ ملا کر زکوٰۃ ادا کرنا لازم ہے ۔ مجمع الانہر: ۱/۲۲، امداد الفتاوی: ۲/٤۱ ۔ (ایضاح المسائل: ص ۱۰۵، نعیمیہ) ۔
کتاب الفتاوی میں ہے:
مکان پر اس وقت زکوٰۃ واجب ہوتی ہے جب مکان تجارتی مقصد سے حاصل کیا گیا ہو، مکان ضرورت سے زیادہ ہو، لیکن مقصود تجارت نہ ہو، بلکہ کرایہ پر لگانا، یا کسی اور کام میں استعمال کرنا ہو تو اب اس میں زکوٰۃ واجب نہیں ۔ (کتاب الفتاوی: تیسرا حصہ ص ۲۷۱) ۔
مزید ملاحظہ ہو: فتاوی محمودیہ: ۹/٤۲۵، جامعہ فاروقیہ، جدید فقہی مسائل: ۱/۲۰۵ تجارت اور کرایہ داری میں فرق ۔
واللہ سبحانہ و تعالی اعلم