ایام حج تک رہنے کا ویزا نہ ہونے پر فرضیت کا حکم:

صورتِ مسئولہ میں اگر ویزا بڑھانا ممکن ہے اور رہنے کی استطاعت بھی ہے یا اپنے ملک جا کر دوبارہ آنے کی استطاعت بھی ہے تو حج فرض ہوگا، ورنہ نہیں، البتہ بعض علماء کا قول ہے کہ اگر استطاعت ہو تو مکہ مکرمہ سے حج بدل کرا دینا چاہیے ۔
ملاحظہ ہو جدید فقہی مسائل میں ہے:
بعض اوقات لوگ شوال، ذوالقعدہ میں مکہ مکرمہ آ جاتے ہیں حج ان پر فرض ہوتا ہے، لیکن ان کا ویزہ زمانہ حج کا نہیں ہوتا ہے اور قانونی اعتبار سے وہ حج تک نہیں رک سکتے، ایسی صورت میں اگر ان پر حج فرض باقی ہو تب تو ان کو پوری پوری کوشش کرنی چاہیے کہ کس طرح وہ حج کر لیں ۔
لیکن اگر قانونی مجبوری کے تحت حج تک اس کا قیام ممکن نہ ہو تو پھر حج اس پر فرض نہیں ہوگا، اس لیے کہ استطاعتِ سبیل جس کو قرآن نے حج فرض ہونے کے لیے شرط قرار دیا ہے اس کے حق میں مفقود ہے، نیز بعض حضرات کی غلط فہمی کے پیشِ نظر عرض ہے کہ سمجھ لینا چاہیے کہ جو لوگ حج ادا کر چکے ہیں ان پر حج کے زمانہ میں عمرہ کرنے کی وجہ سے دوبارہ حج فرض نہیں ہو جاتا ۔ (جدید فقہی مسائل: ۱/۲۵٦، نعیمیہ) ۔
احسن الفتاوی میں ہے:
اگر شوال وہیں شروع ہو گیا اور اس کے پاس حج کے مصارف بھی ہوں تو حج فرض ہو جائے گا، اگر حکومت کی طرف سے حج تک ٹھہرنے کی اجازت نہ ہو تو فرضیتِ حج میں اختلاف ہے، راجح یہ ہے کہ اس پر حج بدل کرانا فرض ہے مکہ مکرمہ ہی سے حج کرا دے، بعد میں خود حج کی استطاعت ہو گئی تو دوبارہ کرے ۔ (احسن الفتاوی: ٤/۵۱۹) ۔
مزید ملاحظہ ہو: آپ کے مسائل اور ان کا حل: ٤/۳۵) ۔
واللہ سبحانہ و تعالی اعلم