"مجھے دو بارہ فون کر لے تو سمجھ لیجیے کہ طلاق" کہنے کا حکم:

بصورتِ مسئولہ ان الفاظ سے "اگر تو مجھے دوبارہ فون کر لے تو سمجھ لیجیے کہ تیسری طلاق واقع ہو چکی" طلا ق واقع نہیں ہوئی ۔
ملاحظہ فرمائیں عالمگیری میں ہے:

داده انگارأوكرده انگار لا يقع وان نوى ولو قال لها بعد ما طلبت الطلاق. (الفتاوى الهندية: ۱/۳۸۰).

فتاوی قاضيخان میں ہے:

امرأة قالت لزوجها مرا طلاق ده قال الزوج داده انگارأوكرده انگار لا يقع الطلاق وإن نوي. (فتاوى قاضيخان: ۲/۲۱۰).

نیز مرقوم ہے:

كأنه قال لها بالعربية: احسبي أنك طالق وان قال ذلك لا يقع وان نوى. (قاضيخان: ۲/۲۱۰).

اردو فتاوی میں حضرت مولانا ظفر احمد تھانوی عثمانی رحمه الله نے امداد الاحکام: ۲/٤۲۳ پر یہ مسئلہ تحریر فرمایا ہے وہاں ملاحظہ فرما لیا جائے ۔
باقی رہا یہ مسئلہ کہ اگر بیوی کو خطاب کیا اور وہ ٹیلی فون سے اٹھ گئی تھی تو اس میں فقیر کی رائے یہ ہے کہ طلاق واقع ہو گی، اس کو اس طرح سمجھ لیجیے جیسے کوئی شخص بیوی کو طلاق کا خط لکھ کر خط اس کے مکان پر پہنچا دے، اور بیوی گھر پر موجود نہ ہو تو طلاق واقع ہو جائے گی ۔
در مختار میں ہے:

ثم المرسومة لا تخلو إما أن أرسل الطلاق بأن كتب أما بعد فأنت طالق فكما كتب هذا يقع الطلاق. (الدر المختار مع الشامي: ۳/۲۹٦، سعيد).

یہ مسئلہ فتاوی دار العلوم دیوبند کی پہلی جلد عزیز الفتاوی میں بھی موجود ہے، لیکن غالباً اس میں ایک لفظ لکھنے سے رہ گیا ہے عنوان ہے، وقوع طلاق کے لیے زوجہ کا سامنے ہونا شرط نہیں ہے: پھر سوال کے الفاظ یہ ہیں زید نے اپنی زوجہ کو جب کہ وہ اس کے سامنے تھی، یہاں غالباً "نہیں" کا لفظ رہ گیا ہے، کیوں کہ جواب میں یہ الفاظ ہیں: سامنے ہونا زوجہ کا وقوع طلاق کے لیے ضروری نہیں الحاصل حاضر ہونا عورت کا بوقت طلاق شرط نہیں ۔ (عزیز الفتاوی: جلد اول: ٤۸۲، دار الاشاعت) ۔
واللہ سبحانہ و تعالی اعلم