نذر بالمعصیۃ لعینہٖ پر ایک شبہ کا ازالہ:

بظاہر حضرت مولانا کی عبارت محل نظر ہے اور فقہاء کی تصریحات کی روسے صحیح معلوم نہیں ہوتی، غالباً حضرت مولانا کا ذہن نذرِ معصیت کی تقسیم کی طرف نہیں گیا ہوگا ۔
مولانا کی عبارت ملاحظہ ہو قاموس الفقہ میں ہے:
جس چیز کی نذر مانی گئی ہو وہ معصیت ہو، جیسے شراب پینے کی نذر ایسی نذر کو پورا کرنا حرام اور ترک کرنا واجب ہے اور اس پر امت کا اجماع ہے، البتہ جیسا کہ اس سے پہلے مذکور ہوا اس صورت میں کفارہ قسم ادا کرنا واجب ہوتا ہے، آج کل میلاد منعقد کرنے کی نذر مانتے ہیں یہ سب اس حکم میں ہے اور اس کو پورا کرنا جائز نہیں بلکہ کفارہ قسم ادا کر دینا چاہیے اور آئندہ ایسی نذر سے توبہ کرنا چاہیے ۔ (قاموس الفقہ: ۵/۱۸۳) ۔
مذکورہ بالا عبارت میں مولانا نے معصیت لعینہٖ کی مثال پیش کی ہے، و بعد ازاں وجوبِ کفارہ کا حکم تحریر فرمایا ہے، جب کہ فقہاء کی عبارات کے پیش نظر مسئلہ برعکس معلوم ہوتا ہے، لہذا صحیح اور راجح یہی ہے کہ معصیت لعینہٖ کی نذر منعقد ہی نہیں ہوتی اور کفارہ بھی واجب نہیں ہوتا ۔
واللہ سبحانہ و تعالی اعلم