موجود ہ دور میں دیت کس پر لازم ہو گی؟

دیت عاقلہ پر ہے ہاں اگر مجرم اقرار کرے کہ یہ کام میں نے کیا ہے اور عاقلہ نے اس کی تصدیق نہیں کی تو پھر قاتل کے مال میں ہے ۔ ملاحظہ ہو در مختار میں ہے:

ولا ما لزم بصلح أو اعتراف إلى قوله إلا أن يصدقوه في إقراره أو تقوم حجة وإنما قبلت البينة هنا مع الإقرار مع أنها لا تعتبر معه لا نها تثبت ما ليس بثابت بإقرار المدعي عليه. (الدر المختار مع الشامي: ٦/٦۴۳، كتاب المعاقل، سعيد).

عاقلہ ہونے کا دار و مدار آپس میں تعاون اور تناصر پر ہے، لہذا جن لوگوں کے درمیان باہم تعاون و تناصر ہے، وہ اس کی عاقلہ ہے، لہذا جہاں کوئی قبیلہ ہے اور وہ قبائل منظم ہیں، اور ہر شخص کو معلوم ہے کہ اس کا قبیلہ فلاں ہے، تو وہ اس کی عاقلہ ہے، وہ اس کی دیت ادا کرے، اور اگر قبیلہ نہیں ہے، لیکن منظم برادری ہے تو وہ دیت ادا کرے، اور اگر برادری بھی نہیں ہے تو پھر جیسے آج کل ٹریڈ یونین ہوتی ہے اور ان کے درمیان آپس میں تعاون و تناصر ہوتا ہے تو وہ اس کی عاقلہ ہو سکتی ہے، لیکن اگر یہ بھی مفقود ہے تو پھر بہرحال دیت قاتل کے مال میں ہونی چاہیے ۔ ملاحظہ علامہ شامی فرماتے ہیں:

قلت: وفي زماننا بخوارزم لا يكون إلا في مال الجاني إلا إذا كان من أهل قرية أو محلة يتناصرون لأن العشائر فيها قد وهت ورحمة التناصر من بينهم قد رفعت وبيت المال قد انهدم. (فتاوى الشامي: ٦/٦۴۵، سعيد).

واللہ سبحانہ و تعالی اعلم