ایک مدرسہ کی مد کی رقم دوسری مد میں خرچ کرنے کا حکم:

بصورتِ مسئولہ مدرسہ کی ایک مد کی رقم دوسری مد میں خرچ کرنا صحیح اور درست نہیں، اس لیے کہ موکل کی وکالت کو ملحوظ رکھنا ضروری ہے، اور اس پر عمل پیرا ہونا لازم ہے، لہذا جب آدمی نے کتابوں کے لیے رقم دی تو اس کو دوسری مد میں خرچ کرنا درست نہیں ۔
فتاوی شامی کی عبارت ملاحظہ فرمائیں:

الوكيل إنما يستفيد التصرف من الموكل وقد أمره بالدفع إلى فلان فلا يملك الدفع إلى غيره، كما لو أوصي لزيد بكذا ليس للوصي الدفع إلى غيره فتأمل. (فتاوى الشامي: ۲/۲٦٦، سعيد).

مدرسہ میں جب کسی نے ایک رقم ایک مد میں دی تو چونکہ مہتمم مدرسہ معطی کا وکیل ہے اور موکل نے جس مد میں خرچ کرنے کے لیے کہا ہے، اس میں وکیل کو خرچ کرنا ضروری ہے تو جب اس نے کتابوں کی مد میں رقم دی تو اس کو تعمیر میں خرچ کرنا خیانت اور وعدہ خلافی ہے ۔
فتاوی محمودیہ میں ہے:
جس جگہ خرچ کرنے کے لیے وہ روپیہ دیا ہے اسی جگہ خرچ کرنا لازم ہے اگر دوسری جگہ خرچ کر دیا تو ضمان لازم ہوگا اس لیے کہ متولی امین اور وکیل ہے معطی کی تصریح کے خلاف خرچ کرنے کا اس کو حق نہیں ۔ (فتاوی محمودیہ: ۱۵/٤۷٤، فاروقیہ ۔ امداد الفتاوی: ۳/۳۱۵، ۳۱٦) ۔
نیز مرقوم ہے چندہ دینے والوں کو اگر یہ منظور ہے اور اس پر کوئی اعتراض نہیں تو ایسا کرنا شرعاً درست ہے ۔ (فتاوی محمودیہ: ۱۵/٤۷٤، فاروقیہ) ۔
واللہ سبحانہ و تعالی اعلم