فلیٹ بنانے کا آرڈر لینے کے بعد نہ بنانے پر مثل دینے کا حکم:

جب کوئی شخص مثلاً: زید کسی کمپنی کو رقم دے کر مکان یا فلیٹ بنوانے کے لیے کہ دے اور مکان یا فلیٹ بُک کرا کر معاملہ طے کر لے تو اس معاملہ کو زمانہ حال کے فقہاء نے استصناع میں داخل فرمایا ہے، پھر اس میں تاریخ متعین ہو یا نہ ہو، مختار قول کے مطابق اس سے استصناع میں کوئی فرق نہیں پڑے گا ۔
شرح مجلہ میں شیخ محمد خالد الاتاسی رقم طراز ہیں:

ثم ما ورد التعامل في استصناعه سواء كان مؤجلاً إلى شهر أو أزيد أو لم يكن مؤجلاً فالتأجيل يحمل على الاستعجال ولا يخرجه عن كونه استصناعاً، وهو قول الإمامين (أي الصاحبين) وعليه مشت هذه المادة لكونه أرفق. (شرح المجلة: ۱/٤۰۳، مكتبة رشيدية، كوئته).

پھر جب مدت گزرنے کے بعد صانع نے خاص جگہ پر فلیٹ بنانے سے معذرت کر لی اور روپے واپس لینے کے لیے کہا اور مستصنع روپیوں کے لینے سے انکاری ہے کیوں کہ اس کو زبردست نقصان ہے تو مستصنع نے عقد کو فسخ نہیں کیا اور صانع کو یک طرفہ عقد فسخ کرنے کا اختیار نہیں، اب صانع بلڈر اس فلیٹ کا مثل مستصنع کو دے دے ۔
بیع سلم کے بارے میں شرح مجلہ میں لکھا ہے:

ولو انقطع عن أيدي الناس بعد الحلول قبل أن يوفي المسلم فيه فرب السلم بالخيار إن شاء فسخ العقد وأخذ رأس ماله وإن شاء انتظر وجوده أي المسلم فيه. (شرح المجلة: ۲/۳۹۸، مكتبة رشيدية).

سلم اور استصناع اکثر احکام میں یکساں ہیں ۔ یہاں بھی جب مکان موعود پر وہ فلیٹ نہیں مل سکتا تو صانع اس کو مثل دے دے، اور اس لائن کے ماہرین مثل کو اچھی طرح جانتے ہیں ۔
پس ہماری ناقص رائے یہ ہے کہ آرڈر دیا ہوا شخص جو بلڈر کہلاتا ہے فلیٹ موعود کا مثل مستصنع زید کو دے دے ۔
بلڈر جو لوگوں کو فتوی دکھاتا ہے کہ میں زید کو اس جمع کی ہوئی رقم واپس کروں گا یہ اس وقت صحیح ہے جب زید عقد کو فسخ کر دے اور اگر زید فلیٹ یا اس کا مثل مانگتا ہے تو پھر بلڈر کو مثل دینا پڑے گا، پھر در حقیقت بلڈر ہی یہ فلیٹ زید کو حسب وعدہ دیگا، اگر قانونی مجبوری کی وجہ سے روپے زید کے اکاؤنٹ میں جمع ہو جائیں تو اس میں کوئی حرج نہیں فلیٹ کے مثل دینے کی صورت میں بلڈر فلیٹ خرید لے گا اور شرا کی تکمیل کے بعد فلیٹ زید کو حسبِ وعدہ دینے کا پابند ہو گا ۔ واللہ سبحانہ و تعالی اعلم ۔