سامان میں شرکت کا حکم:

فقہاء فرماتے ہیں کہ شرکتِ مفاوضہ اور شرکتِ عنان کے لیے شریکین جو مال جمع کریں گے وہ نقد کے قبیل سے ہو گا، مثلاً سونا چاندی، یا فلوس رائجہ وغیرہ میں سے کسی کا ہونا ضروری ہے، سامان میں شرکت صحیح اور درست نہیں ہو گی ۔
شرحِ مجلہ میں ہے:

كون رأس المال من قبيل النقود شرط لصحة شركة الأموال سواء كانت مفاوضة أو عناناً فلا تجوز بالعروض والمكيل والموزون عندنا، لأنه يودي إلى ربح مالم يضمن لأنه إذا باع كل واحد منهما رأس ماله وتفاضل الثمنان، فما يستحقه أحدهما من الزيادة في مال صاحبه ربح مالم يملك ومالم يضمن. (شرح المجلة، للأتاسي، ٤/۲٦۱، المادة: ۱۳۳۸).

لیکن حضرت مولانا ظفر احمد عثمانی رحمه الله نے امداد الاحکام میں شرکت فی العروض کے جواز کا فتوی دیا ہے، پس ابتلائے عام کی وجہ سے اس مسئلہ میں دیگر ائمہ کے قول پر فتوی دے کر شرکت مذکورہ اور شرکت فی العروض کے جواز کا فتوی دیا جاتا ہے ۔ (امداد الاحکام: ۳/٤٤۵).
حضرت حکیم الامت مولانا اشرف علی تھانوی رحمه الله نے "امداد الفتاوی" میں ذکر فرمایا ہے کہ عروض میں شرکت کے بارے میں اگر چہ فقہاء کرام کا اختلاف ہے، لیکن موجودہ زمانے کی ضروریات اور ابتلائے عام کی وجہ سے امام مالک رحمه الله کے مذہب پر فتوی دیا جا سکتا ہے، کیوں کہ اس سے عصر جدید کی مشکلات اور پریشانیوں کے حل کرنے میں زیادہ مدد مل سکتی ہے ۔ (شرکت اور مضاربت عصر حاضر میں، ص۲۵٤، ادارۃ المعارف کراچی) ۔
مزید ملاحظہ ہو: (امداد الفتاوی: ۳/٤۹۵) ۔
واللہ سبحانہ و تعالی اعلم