بلا حکمِ حاکم زانی کو قتل کرنے کا حکم:

لوگوں کے افعال کو اسلامی تعلیمات کا معیار نہیں بنایا جا سکتا، اس لیے کہ بہت سی مرتبہ لوگوں کے افعال اسلامی تعلیمات کے خلاف ہوتے ہیں، اسلام اور شریعتِ اسلامیہ سے اس کو دور کی بھی نسبت نہیں ہوتی، چاہے وہ لوگ ا س کو اسلام اور مذہب کا نام دیتے ہوں، یہ واقعہ اسی کی ایک تازہ مثال ہے۔
حدودِ شرعیہ نافذ کرنے کے لیے بنیادی شرط یہ ہے کہ اسلامی حکومت ہو اور قاضی شرعی موجود ہو اس کے بغیر حدود و قصاص نافذ نہیں ہو سکتے، ورنہ نفاذِ شریعت تو در کنار فساد عام ہوگا۔
ملاحظہ ہو فتاوی الشامی میں ہے:
فيشترط الإمام لاستيفاء الحدود. (فتاوى الشامي: ٦/۵٤۹، سعيد).

قاضی مجاہد الاسلام صاحب رحمه الله اسلامی عدالت میں فرماتے ہیں:
معاملہ ایسا ہو کہ اسے عوام الناس کے ہاتھوں میں دے دینا فتنہ و فساد کا موجب ہو اور اس کی وجہ سے ایسے انتشار کا خطرہ ہو جو جان و مال کی بربادی کا ذریعہ ہو جب بھی کسی معاملہ میں ایسی صورتِ حال پیدا ہو جانے کا خدشہ ہوگا وہاں حکم حاکم کی ضرورت پیش آ جائے گی مثلاً: حدود۔ (اسلامی عدالت، ص
۲۴۱
، قاضی پبلشرز)۔
نیز رجم کرنے کے لیے اور بھی شرائط ہیں: (۱) چار عینی گواہوں سے ثابت ہونا۔ (۲) محصن ہونا، اور صفتِ احصان سے متصف ہونے کے لیے نکاح صحیح کا ہونا شرط ہے۔
پھر شرائط پورے ہونے کے بعد قاضی یعنی مسلمان جج کے حکم سے حد جاری ہوتی ہے۔
ہدایہ میں ہے:
فالبينة أن تشهد أربعة من الشهود على رجل وامرأة بالزنا

وقالوا رأيناه وطيها في فرجها كالميل في المكحلة

ويبتدئ الشهود برجمه ثم الإمام ثم الناس. (الهداية: ۲/ ۵۰۷، ۵۰۹).

خلاصہ یہ ہے کہ ثبوتِ رجم کے لیے سخت شرائط ہیں اور ادنی شبہ کی وجہ سے حد ساقط ہو جاتی ہے اور تاریخ اسلامی میں ایک بھی ایسا واقعہ پیش نہیں آیا کہ گواہوں سے رجم ثابت ہوا ہو۔
واللہ سبحانہ و تعالی اعلم