نجاست کا تھیلا ساتھ رکھ کر مسجد میں با جماعت نماز پڑھنے کا حکم:

عام حالات میں بدبو دار چیزیں نجاست مسجد میں داخل کرنا مکروہِ تحریمی ہے خصوصاً جب کہ تلویثِ مسجد کا اندیشہ ہو، لیکن جو شخص معذور ہے جیسا کہ صورتِ مسئولہ میں تو یہ تھیلا اس کے پیٹ اور معدہ کے حکم میں ہو گا، لہذا اگر بدبو نہ ہو اور چھپا ہوا ہو اور لوگوں کے لیے باعثِ نفرت نہ ہو تو اس کا مسجد جانا جائز اور درست ہے ۔ ہاں تھیلے میں خروجِ نجاست ناقض وضو ہے لیکن چونکہ یہ آدمی معذور ہے اس کے معدے سے نجاست برابر نکلتی رہتی ہے اس لیے اس کا وضو وقت کے نکلنے سے ٹوٹے گا الا یہ کہ دوسرا ناقض پایا جائے ۔
نبی پاک ﷺ کے زمانہ میں مستحاضہ عورت کا مسجد میں اعتکاف کرنا ثابت ہے اگر چہ نجاست ساتھ تھی لیکن چھپی ہوئی تھی اور بدبو وغیرہ بھی نہیں تھی لہذا آپ علیہ الصلاۃ و السلام نے نکیر نہیں فرمائی ۔
ملاحظہ ہو بخاری شریف میں ہے:

عن عائشة رضي الله تعالى عنها قالت: اعتكفت مع رسول الله ﷺ امرأة من أزواجه مستحاضة فكانت تري الحمرة والصفرة فربما وضعنا الطست تحتها وهي تصلي. (رواه البخاري: ۱/۲۷۳/۱۹۹۱، باب اعتكاف المستحاضة، فيصل)

اس حدیث کی شرح میں علامہ عینی رحمه الله فرماتے ہیں کہ کپڑے یا مسجد ملوث نہ ہو تو ٹھیک ہے اسی طرح جو مستحاضہ کے معنی میں ہے یعنی معذور وغیرہ ان کے لیے بھی مسجد میں داخل ہونے اور اعتکاف کرنے کی اجازت ہے ۔
ملاحظہ ہو عمدۃ القاری میں ہے:

ومما يستنبط منه: جواز اعتكاف المستحاضة، وجواز صلاتها لأن حالها حال الطاهرات وإنها تضع الطست لئلا يصيب ثوبها أو المسجد وأن دم الاستحاضة رقيق ليس كدم الحيض، ويلحق بالمستحاضة ما في معناها كمن به سلس البول والمذي والودي ومن به جرح يسيل في جواز الاعتكاف. (عمدة القاري: ۳/۱۳۰، كتاب الحيض، باب الاعتكاف للمستحاضة، دار الحديث، ملتان).

واللہ سبحانہ و تعالی اعلم