ڈاکٹر کے لیے بوقت ضرورت فرض نماز توڑنے کا حکم:

جب کسی مریض کی حالت بہت سنگین ہو جائے مرض بڑھ جانے یا جان چلے جانے کا خطرہ ہو، اور کوئی نائب [جو اچھی طرح یہ کام انجام دے سکتا ہو] موجود نہ ہو تو نماز توڑ کر جانا واجب ہے چاہے نماز فرض ہو یا نفل، ہاں اگر نماز قریب الختم ہے یا چند منٹ میں ختم ہو جائے گی تو نماز پوری کر کے چلا جائے کیوں کہ اکثر چند منٹ گزرنے سے فرق نہیں پڑتا ۔
پھر جو نماز توڑ دی ہے اس کو بعد میں پڑھ لے اگر وقت ہے ورنہ قضا کر لے ۔
اور اگر کوئی صحیح ماہر نائب موجود ہو تو پھر نماز پوری کر کے جائے ۔
خطبہ سننے کے دوران اگر اس قسم کی کوئی ضرورت پیش آ جائے تو خطبہ چھوڑ کر جانے کی گنجائش ہے، اور اس کی کوئی قضا نہیں ہے ۔
اگر نماز ِ تراویح کے دوران نماز توڑ کر جانے کی ضرورت ہو تو بعد میں دو رکعت کی قضا کرے ۔
در مختار میں ہے:

ويجب القطع لنحو إنجاء غريق أو حريق. وفي الشامية: والحاصل أن المصلي متي سمع أحداً يستغيث وإن لم يقصده بالنداء، أو كان أجنبياً، وإن لم يعلم ما حل به أو علم، كان قدرة على إغاثته وتخليصه، وجب عليه إغاثته وقطع الصلاة فرضاً كانت أو غيره قطع الصلاة

والواجب لا حياء نفس. (الدر المختار مع رد المحتار: ۲/٥۱، ٥۲، سعيد).

فتاوی سراجیہ میں ہے:

إذا خاف المصلي أن يسقط أعمي أو صبي من سطح، أو تحرقه نار، أو يغرقه ماء، عليه قطع الصلاة، ولو سرق منه ما يساوي درهماً له قطع الصلاة. (الفتاوى السراجية، ص: ۱۰٥).
وللاستزادة انظر: (الدر المختار مع رد المحتار: ۱/٦٥٤، سعيد، والفتاوى الهندية: ۱/۱۰۹، والبحر الرائق: ۲/۷۱، كوئته).

واللہ سبحانہ و تعالی اعلم