سونے کے ساتھ کچھ چاندی ہو تو زکوۃ کا حکم:

اگر کچھ مقدار سونے کی اور کچھ مقدار چاندی کی ہو تو دونوں کو ملا کر اگر ان کی قیمت ساڑھے باون تولہ چاندی کی قیمت کو پہنچ جائے تو پھر اس میں زکوٰۃ واجب ہو جائے گی ۔
فتاوی ہندیہ میں ہے:

وتضم قيمة العروض إلى الثمانين والذهب إلى الفضة قيمة كذا في الكنز حتى لو ملك مائة درهم وخمسة دنانير قيمتها مائة درهم تجب الزكاة عنده. (الفتاوى الهندية: ۱/۱۷۹، فصل في زكاة الذهب والفضة، وكذا في الهداية: ۱/۱۹٦، فصل في العروض).

ہدایہ میں ہے:

ثم قال: يقومها بما هو أنفع للمساكين احتياطا لحق الفقراء قال وهذا رواية عن أبي حنيفة رحمه الله. (الهداية: ۱/۱۹۵، فصل في العروض، شركة علمية).

بہشتی زیور میں ہے:
کسی کے پاس نہ تو پوری مقدار سونے کی ہے نہ پوری مقدار چاندی کی بلکہ تھوڑا سونا ہے اور تھوڑی چاندی ہے تو اگر دونوں کی قیمت ملا کر ساڑھے باون تولہ چاندی کے برابر ہو جاوے یا ساڑھے سات تولہ سونے کے برابر ہو جاوے تو زکوۃ واجب ہے، اور اگر دونوں چیزیں اتنی تھوڑی ہیں کہ دونوں کی قیمت نہ اتنی چاندی کے برابر ہے نہ اتنے سونے کے برابر تو زکوۃ واجب نہیں ۔ (بہشتی زیور تیسرا حصہ: ۲٤۰، دار الاشاعت) ۔
واللہ سبحانہ و تعالی اعلم