برائے حج جمع کردہ رقم پر زکوٰۃ کا حکم:

صورتِ مسئولہ میں جو رقم بعد رمضان اس کو مل گئی اس پر زکوٰۃ لازم ہے اور جتنی رقم حکومت نے ضروریاتِ حج کے لئے لے لی وہ زکوٰۃ سے مستثنیٰ ہے یعنی اس پر زکوٰۃ لازم نہیں ہے۔
ملاحظہ ہو شامی میں ہے:

إذا أمسكه لينفق منه كل ما يحتاج به فحال الحول وقد بقي معه منه نصاب فإنه يزكي ذلك الباقي وإن كان قصده الإنفاق منه أيضاً في المستقبل لعدم استحقاق صرفه إلى حوائجه الأصلية وقت حولان الحول، بخلاف ما إذا حال الحول وهو مستحق الصرف إليها. (شامي: ۲/۲٦۲، سعيد).

احسن الفتاوی میں ہے:
آمد و رفت کے کرایہ اور معلم وغیرہ کی فیس کے لئے جو رقم دی گئی ہے اس پر زکوۃ نہیں ہے، اس سے زائد رقم جو کرنسی کی صورت میں اس کو واپس ملے گی اس میں سے یکم رمضان تک جتنی رقم بچے گی اس پر زکوۃ فرض ہے، جو خرچ ہو گئی اس پر نہیں،
قال في الشامية: إذا أمسكه لينفق منه كل

الخ
۔ (احسن الفتاوی ٤/۲٦٤)۔
بعض مفتی حضرات فرماتے ہیں کہ کل رقم پر زکوۃ فرض ہے۔ ملاحظہ ہو: خیر الفتاوی: ۳/٤۷٤، وغیرہ۔
لیکن جب آدمی حج کے لئے رقم جمع کراتا ہے اور اس کے بدلے میں اس کو حج کے انتظام کا حق مل جاتا ہے تو یہ رقم حاجی صاحب کی ملکیت سے نکل گئی ہاں جو رقم واپس ملے گی اس پر زکوۃ ہو گی، جب رقم ملکیت سے نکلی تو اس پر زکوٰۃ نہیں، اس کی مثال ایسی ہے جیسے کسی کو کھیت کی سیرابی کے لئے نہر کے انتظام کا حق مل جائے اور اس کے عوض رقم ادا کرے تو یہ رقم ملکیت سے نکلی، ہدایہ میں حق الشرب کی بیع کو جائز کہا یا حق المرور کے عوض آدمی کسی کو رقم دے دے تو وہ ملکیت سے نکل گئی یا اجارہ میں ایک سال کا کرایہ پہلے سے ادا کر دیا تو وہ رقم بھی ملکیت سے نکل گئی یا استصناع میں جوتا بنانے کا آرڈر دے دیا اگر چہ ابھی تک تیار نہیں ہوا لیکن جب ثمن دے دے تو رقم ملکیت سے نکل گئی اور یہ مسئلہ اجارہ کی طرح یوں ہے کہ حکومت بمنزلہ اجیر ہے اور یہ شخص بمنزلہ مستاجر ہے اور اگر اجارہ میں پہلے سے اجرت دی جائے تو وہ اجرت ملکیت سے خارج ہو جاتی ہے۔
ملاحظہ ہو عالمگیری میں ہے:

ثم الأجرة تستحق بإحدى معانٍ ثلاثة: إما بشرط التعجيل، أو بالتعجيل، أو باستيفاء المعقود عليه، فإذا وجد أحد هذه الأشياء الثلاثة، فإنه يملكها كذا في شرح الطحاوي. (الفتاوى الهندية: ٤/٤۱۳، كتاب الإجارة، في بيان متى تجب الأجرة).

بدائع الصنائع میں ہے:

لأنهما لما شرطا تعجيل البدل لزم اعتبار شرطهما لقوله عليه السلام "المسلمون على شروطهم" وملك الآجر البدل حتى تجوز له هبته والتصدق به والإبراء عنه. (بدائع الصنائع: ٤/۲۰۳، فصل في حكم الإجارة، سعيد).

لہذا حکومت اس رقم کی مالک بن گئی اور حاجی صاحب پر اس کی زکوۃ نہیں اور ہم اس مسئلہ میں حضرت مفتی رشید صاحب صاحبِ احسن الفتاوی کے تابع ہیں۔
کتاب الفتاوی میں ہے:
سفر حج کے کرایہ اور مکہ مکرمہ میں قیام کے دوران ہونے والے لازمی اخراجات، اس کی حاجتِ اصلیہ یعنی بنیادی ضروریات میں داخل ہیں، ان میں زکوۃ واجب نہیں، اس سے زائد جو رقم حاجی اپنے طور پر سفر حج میں خرچ کرتا ہے وہ حاجتِ اصلیہ میں داخل نہیں اس کی زکوۃ واجب ہو گی۔ (کتاب الفتاوی: تیسرا حصہ ص۲۷٤)۔
واللہ سبحانہ و تعالی اعلم