بینک میں جمع شدہ رقم پر زکوٰۃ کا حکم:

بینک میں جمع شدہ رقم پر زکوٰۃ لازم ہے اس لئے کہ مالک نے اپنے اختیار سے جمع کرائی ہے اور یہ رقم اس کی ملک میں ہے، لہذا سال گزرنے پر زکوٰۃ لازم ہے ۔
ملاحظہ ہو جدید فقہی مسائل میں ہے:
بینک میں کرنٹ اکاؤنٹ میں رقم رکھی جائے یا فکس ڈپازٹ کی جائے ہر دو صورت میں جمع شدہ رقم پر زکوٰۃ واجب ہو گی، زکوٰۃ واجب ہونے کے لئے ملکیت اور قبضہ ضروری ہوتا ہے، بنک میں جمع رقم پر ملکیت تو جمع کرنے والے کی ظاہر ہی ہے، قبضہ بظاہر اس کا نہیں ہے مگر چونکہ اس نے اپنے ارادہ و اختیار سے بینک میں رقم جمع کی ہے، لہذا بینک قبضہ میں اصل مالک کا نائب ہے، اس طرح بالواسطہ جمع کنندہ کا قبضہ بھی ثابت و محقق ہے، اس لئے فقہاء نے از راہ امانت رکھے گئے مال میں زکوٰۃ واجب قرار دی ہے کیوں کہ امین کا قبضہ اصل مالک کا قبضہ ہے، لہذا ہر ایسی جمع شدہ رقم پر زکوٰۃ واجب ہو گی جس کو مالک نے اپنے اختیار و مرضی سے جمع کیا ہو ۔ (جدید فقہی مسائل: ۱/۲۱٦، نعیمیہ) ۔
مزید ملاحظہ ہو: فتاوی دار العلوم: ٦/۱۳٤، و امداد الاحکام: ۲/۲۵، و فتاوی رحیمیہ: ۲/۱٤ ۔
واللہ سبحانہ و تعالی اعلم