عمارتی کمپنی کے شیرز پر زکوٰۃ کا حکم:

صورتِ مسئولہ میں اگر کمپنی تجارت کرتی ہے تو شیرز کی اصل رقم اور منافع دونوں پر زکوٰۃ لازم ہے اور اگر کمپنی تجارت نہیں کرتی صرف کرایہ وصول کیا جاتا ہے تو اس کے شیرز پر زکوٰۃ ہے یعنی منافع پر زکوٰۃ لازم ہے اصل رقم پر زکوٰۃ نہیں ہے ۔
ملاحظہ ہو کفایت المفتی میں ہے:
کمپنی تجارت کرتی ہے تو زکوٰۃ جمع شدہ رقم پر ہو گی اور اگر کرایہ وصول کرنے کی کمپنی ہے تو جمع شدہ مال پر زکوٰۃ نہیں، بلکہ حاصل شدہ منافع پر ہو گی ۔ (کفایت المفتی: ٤/۲۵۷، شیرز پر زکوٰۃ، دار الاشاعت) ۔
فتاوی رحیمیہ میں ہے:
شیرز پر زکوٰۃ ہے اگر کمپنی تجارت کرتی ہے، مثلا کپڑا، لوہا، سامان مشتری وغیرہ فروخت کرتی ہے، سیمنٹ بیچتی ہے، بجلی سپلائی کرتی ہے ( جیسے الیکٹرک کمپنی) تو شیرز کی اصل رقم (شیرز کی قیمت) اور شیرز کے منافع دونوں پر زکوٰۃ ہے، اور اگر کمپنی تجارت نہیں کرتی صرف کرایہ وصول کیا جاتا ہے جیسے ٹرام کمپنی ریلوے کمپنی تو اس کے شیرز کے منافع پر زکوٰۃ ہے اصل رقم پر زکوٰۃ نہیں ۔ (فتاوی رحیمیہ: ۲/۱٤) ۔
فتاوی محمودیہ میں ہے:
کارخانہ کی زمین و تعمیرات و مشین خود فروخت کرنے کے لئے نہیں، بلکہ آمدنی حاصل کرنے کا ذریعہ ہیں تو ان پر زکوٰۃ لازم نہیں ان سے حاصل شدہ آمدنی حسبِ ضابطۂ شرعیہ نقود کی طرح زکوٰۃ واجب ہو گی ۔ (فتاوی محمودیہ: ۹/٤۲۷، جامعہ فاروقیہ) ۔
ملاحظہ ہو ہدایہ میں ہے:

وليس في دور السكنى وثياب البدن وأثاث المنازل ودواب الركوب وعبيد الخدمة وسلاح الاستعمال زكاة لأنها مشغولة بالحاجة الأصلية وليست بنامية وعلى هذا كتب العلم لا هلها وآلات المحترفين لما قلنا. (الهداية: ۱/۱۸٦، كتاب الزكاة).

واللہ سبحانہ و تعالی اعلم