زکوٰۃ کی رسید سے ٹیکس کم کرانے کا حکم:

بعض حکومتوں کے ٹیکس اکثر و بیشتر ظالمانہ ہوتے ہیں لہذا اس کو کم کرنے کے لیے تدبیر اختیار کرنا اور کم کرانا جائز ہے، پس جو انکم ٹیکس حکومت کی طرف سے ظلماً عائد کیا جاتا ہے بنا بریں زکوٰۃ کی رسید دکھا کر کم کرانا درست ہے ۔ البتہ وہ ٹیکس جو واجبی ہیں اور ان کا فائدہ کسی نہ کسی شکل میں ہ میں پہنچتا ہے ایسے ٹیکس کا کم کرانا زکوٰۃ کی رسید دکھا کر جائز نہیں ہے ۔ ملاحظہ ہو علامہ سرخسی رحمه الله فرماتے ہیں:

فأما في زماننا إنما يوجد أكثر النوائب بطريق الظلم ومن تمكن من دفع الظلم عن نفسه فذلك خير له

(المبسوط للإمام السرخسي: ۱۰/۳۵، ط: دار الفكر، بيروت).
(وكذا في فتاوى الشامي: ۲/۳۳٦، سعيد، و۵/۳۳۲، سعيد، وفتح القدير: ۷/۲۳۳، وشرح العناية: ۷/۲۲۲، وحاشية الطحطاوي علي الدر: ۱/۳۹۰).

انکم ٹیکس یہ نا واجبی ٹیکس ہے ۔ ملاحظہ ہو مولانا خالد سیف اللہ صاحب لکھتے ہیں:
انکم ٹیکس نا واجبی ٹیکس ہے اور نا واجب حد تک وصول کیا جاتا ہے اس لیے اگر بینک میں کسی مجبوری کے تحت ایسی اسکیم میں رقم رکھنی پڑی جس میں سود حاصل ہوتا ہے، اور سود مل گیا تو اس سود سے انکم ٹیکس ادا کیا جا سکتا ہے،
بشرطیکہ بینک یا وہ ادارہ سرکاری ہی ہو
مکان کا ٹیکس ان بلدیہ سہولتوں کے عوض وصول کیا جاتا ہے، جو حکومت عوام کو فراہم کرتی ہے، یہ ایک جائز اور منصفانہ ٹیکس ہے، جس کا نفع ٹیکس دہندہ کی طرف لوٹتا ہے، لہذا اگر اس میں سود کی رقم ادا کی جائے تو یہ سود سے استفادہ کرنے کے مترادف ہوگا ۔ (کتاب الفتاوی: ۵/۳۱۸، ۳۱۹) ۔
معلوم ہوا کہ نا واجبی ٹیکس کو کم کرانا درست ہے جب کہ واجبی ٹیکس کا نفع ٹیکس دہندہ کی طرف لوٹتا ہے اس لیے زکوٰۃ کی رسید دکھا کر کم کرانا ناجائز ہو گا کیونکہ زکوٰۃ سے استفادہ کے زمرہ میں آئے گا اور یہ ناجائز ہے ۔
مزید تفصیل کے لیے ملاحظہ ہو: (فتاوی العلوم زکریا، جلدِ پنجم، ص ٤۰۰ ۔ ٤۰۳) ۔
واللہ سبحانہ و تعالی اعلم