دو طلاق کے بعد فسخ کرانے پر مغلظہ ہونے کا حکم:

بصورتِ مسئولہ جمعیت کا فسخ شوہر کی کوتاہیوں کے سبب واقع ہوا ہے اس وجہ سے یہ فسخ طلاقِ بائنہ کے حکم میں ہو کر اگلی دو طلاقوں کے ساتھ طلاقِ ثلاثہ کا حکم اختیار کر لے گا، اور عورت کے لیے بغیر حلالہ کے سابقہ شوہر کے ساتھ رشتہ ازدواج میں منسلک ہونا درست نہیں ہوگا ۔
ملاحظہ مختصر القدوری میں ہے:

والفرقة تطليقة بائنة. (قدوري: ۲۱۹، كتاب النكاح).

ہدایہ میں ہے:

لأن فعل القاضي أضيف إلى فعل الزوج فكأنه طلقها بنفسه. (الهداية: ۲/٤۲۱).

فتاوی شامی میں ہے:

قوله فرق الحاكم وهو طلاق البائن. (فتاوى الشامي: ۳/۷۰، سعيد).

الحیلۃ الناجزۃ میں ہے:
جن صورتوں میں قاضی عورت کو اختیار دے ان میں حکم یہ ہے کہ اگر عورت اسی مجلس میں تفریق چاہے تب تو تفریق ہو سکتی ہے ورنہ نہیں، پس اگر عورت نے اسی مجلس میں تخییر کہ دیا کہ میں اس شوہر سے علیحدہ ہونا چاہتی ہوں تو قاضی اس کے شوہر سے کہے کہ اس عورت کو طلاق دے دو اس پر اگر خاوند نے طلاق دے دی تو طلاقِ بائنہ واقع ہو جائے گی، اگر وہ طلاق دینے سے انکار کر دے تو قاضی خود تفریق کر دے یعنی مثلاً یوں کہ دے کہ میں نے تجھ کو اس کے نکاح سے الگ کر دیا تو یہ تفریق بھی شرعاً طلاقِ بائنہ کے قائم مقام ہو جاوے گی ۔ (الحیلۃ الناجزۃ: ۸۲) ۔
دوسری جگہ مذکور ہے:
شرعی پنچایت اگر کسی معاملہ میں متفق ہو کر تفریق کر دے تو اس کا حکم قاضی کے حکم قائم مقام ہوگا، اور تفریق وغیرہ صحیح ہو جائے گی ۔ (الحیلۃ الناجزۃ: ۷٤) ۔
واللہ سبحانہ و تعالی اعلم