مغربی ممالک میں عشاء اور فجر اداء کرنے کا طریقہ:

علمائے کرام نے اس کے چار طریقے لکھے ہیں:
(۱) اقرب الایام کا اعتبار کیا جائے یعنی آخری دن جو شفق غروب ہونے کا وقت ہے اس کو عشاء کے وقت کی ابتدا سمجھ لیا جائے۔
(۲) اقرب البلاد کا اعتبار کیا جائے یعنی قریبی جگہ میں جس وقت شفق غروب ہوتی ہے اس کا اعتبار کر لیا جائے۔
(۳) آفتاب غروب ہونے سے لیکر طلوعِ آفتاب تک کے وقت کو دو حصوں میں تقسیم کر لیا جائے نصف اول مغرب و عشاء کے لیے مناسب وقفے کے ساتھ ہوگا، مثلاً مغرب کے سوا گھنٹے کے بعد عشاء اور نصف اخیر فجر کے لیے ہوگا، اس حساب سے نصفِ ثانی کی ابتدا سے روزہ شروع ہوگا اور اس میں احتیاط ہے۔
(٤) غروبِ آفتاب سے طلوعِ آفتاب تک کے وقت کو سات حصوں میں تقسیم کر کے چھ حصے رات کے اور ساتواں حصہ فجر کا ہوگا۔ مولوی محمد عثمان صاحب نے تفسیر الایمان سندھی میں بحوالہ الدر المختار اور حضرت تھانوی رحمه الله نے امداد الفتاوی (۲/۹۸) میں یہ تحریر فرمایا ہے کہ ہر رات کی صبح صادق تا طلوعِ آفتاب پوری رات کا ساتواں حصہ ہوتا ہے۔ تفصیلات کے لیے حضرت مولانا یعقوب قاسمی صاحب کی کتاب "صبح صادق و شفق" مطالعہ فرمائیں۔
واللہ سبحانہ و تعالی اعلم