دورانِ طواف بیت اللہ شریف پر نگاہ ڈالنے کا حکم:

بحالتِ طواف بیت اللہ شریف کی طرف نگاہ اٹھا کر دیکھنا خلافِ ادب ہے کوئی ناجائز یا حرام نہیں ہے بلکہ طواف کرنے والے کے لیے ادب یہ ہے کہ وہ اپنی نظریں نیچی رکھیں تاکہ طواف میں دل جمعی حاصل ہو جائے ۔ ملاحظہ ہو غنیۃ الناسک میں ہے:

وينبغي أن لا يجاوز بصره محل مشيه كالمصلي لا يجاوز بصره محل سجوده لأنه الأدب الذي يحصل به اجتماع القلب. (غنية الناسك، ص ٦۵، فصل في مستحبات الطواف).

تحفہ حجاج میں بحوالہ مجموعہ فتاوی دار العلوم کراچی، ص ۲۵٦/۲ مرقوم ہے:
طواف کی حالت میں بیت اللہ کی طرف چہرہ اور نگاہ کرنا حرام یا مکروہ نہیں ہے، بلکہ خلافِ ادب ہے ۔ ادب یہ ہے کہ طواف کرنے والا دورانِ طواف اپنی نظر چلنے کی جگہ رکھے، تاکہ اِدھر اُدھر دھیان نہ بٹے، اور یک سوئی سے طواف ادا ہو جائے ۔ (تحفہ حجاج، ص۳۷) ۔ (و کذا فی احسن الفتاوی: ٤/۵٤۸) ۔
واللہ سبحانہ و تعالی اعلم