پانچ رینڈ کے سکوں کو کمی بیشی کے ساتھ فروخت کرنے کا حکم:

بصورتِ مسئولہ اگر اس کو رینڈ کے علاوہ دوسری کرنسی کے عوض کمی بیشی کے ساتھ فروخت کیا جائے تو بالکل جائز اور درست ہے، اور اگر زیادہ رینڈ کے بدلے میں بیچ دے تو علماء کا اختلاف ہے، بعض مفتی حضرات کے نزدیک جائز ہے، کیوں کہ اس کو ثمن حقیقی کی حیثیت حاصل نہیں ہے ۔ لہذا امام ابو حنیفہ رحمه الله اور امام ابو یوسف رحمه الله کے قول پر عمل کرتے ہوے اس کی گنجائش ہے ۔ ہدایہ میں ہے:

ويجوز بيع الفلس بالفلسين بأعيانهما عند أبي حنيفة رحمه الله وأبي يوسف رحمه الله وقال محمد رحمه الله لا يجوز

ولهما أن الثمنية في حقهما تثبت باصطلاحهما إذ لا ولاية للغير عليهما فتبطل باصطلاحهما وإذا بطلت الثمنية تتعين بالتعيين. (الهداية:، باب الربا، ۳/۸۱).

فقہی مقالات میں ہے:
امام ابو حنیفہ رحمه الله اور امام ابو یوسف رحمه الله کے قول پر عمل ان فلوس میں متصور ہو سکتا ہے جو بذاتِ خود بحیثیتِ مادہ کے مقصود ہوں جیسا کہ آپ نے دیکھا ہوگا کہ بعض لوگوں کی یہ عادت ہوتی ہے کہ مختلف ممالک کے سکے اور کرنسی نوٹ اپنے پاس جمع کرتے ہیں، اس جمع کرنے سے ان کا مقصد تبادلہ یا بیع یا اس کے ذریعہ منافع حاصل کرنا نہیں ہوتا بلکہ صرف تاریخی یادگار کے طور پر جمع کرتے ہیں تاکہ آئندہ زمانے میں جب یہ کرنسی بند ہو جائے تو یہ کرنسی ان کے پاس یادگار کے طور ہر باقی رہے بظاہر اس قسم کی کرنسی میں ان دونوں حضرات کے قول پر عمل کرتے ہوے کمی زیادتی کے ساتھ تبادلہ کو جائز کہنے کی گنجائش نکل سکتی ہے ۔ (فقہی مقالات: ۱/۳۷) ۔
اور اگر بحیثیتِ ثمن بھی خرید لے جیسے پرانے نوٹ کے بدلے نئے نوٹ کم کبھی کبھی ملتے ہیں تو یہ بھی بعض مفتی حضرات کے نزدیک جائز ہے ۔
ملاحظہ ہو نظام الفتاوی میں ہے:
نوٹ نہ کیلی ہے اور نہ وزنی بلکہ عددی ہے، اس لیے کمی بیشی کے ساتھ بدلنا جائز ہے ۔ (نظام الفتاوی، کتاب المعاملات، ۱/۲۹۹) ۔
فتاوی فریدیہ میں ہے:
سوال: اگر کوئی شخص ایک ہزار کا نوٹ دس روپے کے نوٹ پر فروخت کرے تو کیا یہ جائز ہے؟
جواب: چونکہ یہ دونوں نوٹ کاغذ کے ہیں نہ چاندی کے ہیں نہ سونے کے، تو یہ تبادلہ شرعاً ناجائز اور ربا نہیں ہے، چونکہ ان کی ذاتی قیمت معمولی ہے اور اعتباری اور سرکاری قیمت غیر معمولی ہے پس یہ تبادلہ ممنوع عرفی ہوگا نہ کہ ممنوع شرعی، اسی طرح ڈالر، ویزہ، ٹکٹ اور کاغذی کرنسی کے تبادلے تفاضل سے ممنوع عرفی ہوں گے نہ کہ ممنوع شرعی ۔ (فتاوی فریدیہ: ۲/٦۷۷) ۔
اس مسئلہ کی تفصیلی بحث پیچھے گزر چکی ہے، وہاں ملاحظہ کی جا سکتی ہے ۔
واللہ سبحانہ و تعالی اعلم